Konkani

 
ಮಾ. ಬಾಪ್. ಫ್ರಾನ್ಸಿಸ್ ಅಸ್ಸಿಸಿ ಅಲ್ಮೇಡಾ,
                        ಯಾಜಕ್ ಅನಿ ವಕೀಲ್ (ಮಂಗ್ಳುರ್ ದಿಯೆಸೆಜ್)

ಪ್ರಸ್ತಾವನ್:

    ‘ಅಯ್ಚಿ ಯುವಜಣಾಂ ಮುಕ್ಲಿ ಪ್ರಜಾ’.  ಹೆಂ ವಾಕ್ಯ್ ಅಯ್ಕೊಂಕ್ ಖುಷಿ ಜಾತಾ ತರೀ ಯುವಜಣಾಂಕ್ ಕಾರ‍್ಯಗತ್ ಕರುಂಕ್ ಕಷ್ಟಾಂಚೆ ಜಾಲಾ. ಅಜ್ ಸಂಸಾರಾಂತ್ ಜಿಯೆತಾನಾ ಸಬಾರ್ ರೀತಿಂಚ್ಯಾ ಹವ್ಯಾಸಾಂಕ್ ಸಾಂಗಾತಾಚ್ ಪಾಡ್ ಸವಯಾಂಕ್ ಒಳಗ್ ಜಾಂವ್ಚೆ ಅವ್ಕಾಸ್ ತಾಂಚ್ಯಾ ಭೊವಾರಿಂ ಮೆಳ್ತಾತ್. ಅಮ್ಚ್ಯಾ ವ್ಹಡಿಲಾನಿಂ ಯುವಜಣಾಂಕ್ ದುರ್ಸೊನ್ ‘ಅಮಿಂ ಯುವಜಣ್ ಜಾವ್ನಾಸ್ತಾಂ ಕಿತ್ಲ್ಯಾ ಶಿಸ್ತೆನ್ ಜಿಯೆತೆಲ್ಯಾಂವ್ ಪುಣ್ ಅತಾಂಚೆ ಯುವಜಣ್ ತಶೆಂ ನಾಂತ್’ ತವಳ್ಚಿ ಪರಿಗತ್ ಅತಾಂಚ್ಯಾ ಪರಿಗತೆಕ್ ಸರಿ ಕರುಂಕ್ ಸಾದ್ಯ್ ನಾಂ. ವ್ಹಡಿಲಾಂಚ್ಯಾ ಕಾಳಾರ್ ಅಸಲ್ಲೆಂ ಸಬಾರ್ ಬದ್ಲಾಲಾ. ಅಜ್ ಘರಾ ಬಸಲ್ಲ್ಯಾ ಕಡೆಂ ಸಂಸಾರ್ ಭೊಂವೊನ್ ಯೆವ್ಯೆತಾ. ಬರೆಂ ಕಿತ್ಲೆಂ ಚಡ್ಲಾ ತಿತ್ಲೆಂಚ್ ವಾಯ್ಟ್ ಘಡ್ತಾ ಅನಿ ಹ್ಯಾ ವರ್ವಿಂ ನವಿಂ ಕಾನುನಾಂ ಜ್ಯಾರಿಯೆಕ್ ಯೆತಾತ್. ಅಯ್ಚ್ಯಾ ಪರಿಗತೆಕ್ ಸರಿ ಜಾವ್ನ್ ಅಮ್ಚ್ಯಾ ಯುವಜಣಾಕ್ ಗುಪಿತ್ ಕಷ್ಟಾಂಕ್ ಒಳಗ್ ಕರ್ಚಿಂ ಅನಿ ತಾಂಕಾ ಗರ್ಜೆಕ್ ಪಡ್ಚಿಂ ದೋನ್ ಕಾನುನಾಂ ಹಾಂಗಾಸರ್ ದೀಂವ್ಕ್ ಪ್ರಯತನ್ ಕರ್ತಾಂ.

1.    ಡ್ರಗ್ಸ್ ಅನಿ ಅಮಾಲ್ ಸೇವನ್- ಕಾನುನ್ ಮಾಹೆತ್
‘ತುಂ ಸಮಾಜೆ ಥಾವ್ನ್ ಕಿತೆಂ ಅಪ್ಣಾಯ್ತಾಯ್ ಮ್ಹಣ್ಚ್ಯಾಕಿ ತುಂ ಕಿತೆಂ ಸಮಾಜೆಕ್ ದಿತಾಯ್ ಮ್ಹಳ್ಳೆಂ ಪ್ರಮುಖ್’ ಅಬ್ರಹಾಮ್ ಲಿಂಕನಾಚಿ ಹಿಂ ಉತ್ರಾಂ ಅಯ್ಚ್ಯಾ ಪರಿಗತೆಕ್ ಬೊರಿಂ ತಾಳ್ ಪಡ್ಚೆ ತಸಲಿಂ. ಅಮ್ಚ್ಯಾ ವ್ಹಡಿಲಾನಿಂ ಸಾಂಗಲ್ಲೆ ಬರಿಂ ಎಕ್ ಕಾಳ್ ಅಸ್‌ಲ್ಲೊ, ಘರ್ಚೆಂ ಬಾಗಿಲ್ ಉಗ್ತೆಂ ದವರ್ನ್ ಸಗ್ಳೊ ಗಾಂವ್ ಭೊಂವೊನ್ ಅಯ್ಲ್ಯಾರಿ ಕೊಣಿಂ ಘರಾ ಭಿತರ್ ರಿಗ್ಚೆ ನಾತಲ್ಲೆಂ. ಪುಣ್ ಆಯ್ಚ್ಯಾ ಕಾಳಾರ್ ಘರಾ ಮ್ಹನಿಸ್ ಅಸ್ತಾನಾಂಚ್ ವಸ್ತ್ ನಪಂಯ್ಚ್ ಕರ್ಚೆ ಚೊರ್ ಅಸಾತ್. ಅಜ್ ಕಾಲ್ ಚೊರ್ ಅಮ್ಚೆ ಸಾಂಗಾತಾಚ್ಚ್ ಭೊಂವ್ತಾತ್ ಅನಿಂ ಕಾಂಯ್ಂಚ್ ಬೆಫಿಕಿರ್ ನಾಸ್ತಾ, ಲಜ್ ನಾಸ್ತಾಂ ಭೊಂವ್ತಾತ್.
ಸಾದಾರ್ಣ್ ಜಾವ್ನ್ ಸಮಾಜೆಂತ್ ಜಾಂವ್ಚೆ ಅಪ್ರಾದ್ ದೋನ್ ರಿತಿನಿಂ ವಿಂಗಡನ್ ಕರ್ಯೆತ್-

ಅ) ಮ್ಹನ್ಶಾಂಕ್ ವಯಕ್ತಿಕ್ ಅನಾಹುತ್‌ಕರ್ನ್ ಅಪ್ರಾದ್ ಕರ್ಚೆ (ಸಾಂಪ್ರಾದಾಯಿಕ್ ಅಪ್ರಾದ್). ದಾಖ್ಲ್ಯಾಕ್; ಖುನಿ ಕರ್ಚಿ, ಚೊರಿ ಕರ್ಚಿ, ಘಾಯ್ ಕರ್ಚೊ, ಇತ್ಯಾದಿ
ಹೆ ಅಪ್ರಾದ್ ಸಾದಾರ್ಣ್ ಜಾವ್ನ್ ಮ್ಹನಿಸ್ ಅಪ್ಲೆಂ ಪೊಟ್ ಭರ್ಚೆ ಪಾಸತ್ ಕರ್ತಾ. ತಾಕಾ ಸಾರ್ಕೆಂ ಜೆವಾಣ್ ಮೆಳನಾತಲ್ಯಾ ವೆಳಾ ವ ಸಾರ್ಕೊ ಉದ್ಯೋಗ್ ನಾತಲ್ಯಾ ವೆಳಿಂ ಅಸಲ್ಯಾ ಕರ್ತುಂವಾಂಕ್ ದೆಂವ್ತಾ. ಹೊ ಅಪ್ರಾದ್ ಸಾದಾರ್ಣ್ ಜಾವ್ನ್ ವಯಕ್ತಿಕ್ ವ ಚಡಿತ್ ವ್ಯಕ್ತಿಂಕ್ ಸಂಭಂದ್ ಜಾಯ್ನಾ.

ಆ) ಸಮಾಜ್ ಕಳಂಕಿತ್ ಕರ್ನ್ ನಾಸ್ ಕರುಂಕ್ ಪ್ರಯತನ್ ಕರ್ಚೆ. ದಾಖ್ಲ್ಯಾಕ್; ಲೊಂಚ್ ಕಾಣ್ಗೆಂವ್ಚೊ, ಮ್ಹನ್ಶಾ ವ್ಯಾಪಾರ್, ಡ್ರಗ್ಸ್ ಅನಿ ಹೆರ್ ನಿರ್ಭಂದಿತ್ ಅಮಾಲ್ ಸೇವನಾಂಚೊ ವ್ಯಾಪಾರ್, ಕಾನುನ್ ಬಾಹಿರ್ ಖಾಣಾಂ ಪದಾರ್ಥ್ ಶೇಖರಣ್ ಕರ್ಚೆಂ, ಜೆವ್ಣಾಂಚ್ಯಾ ವಸ್ತುಂಚೆಂ ಕಲಬೆರಕೆ ಕರ್ಚೆಂ ಇತ್ಯಾದಿ.

ಹ್ಯಾ ದ್ವಾರಿಂ ಮ್ಹನಿಸ್ ಅಪ್ಲೆಂ ಕೀಳ್ ಪಣ್ ದಾಖಯ್ತಾ. ಹೊ ಅಪ್ರಾದ್ ಎಕಾ ವ ಥೊಡ್ಯಾಂ ವ್ಯಕ್ತಿ ವಿರೋದ್ ನ್ಹಯ್ ಬಗಾರ್ ಸಗ್ಳ್ಯಾ ಸಮಾಜೆ ವಿರೋದ್. ಸಗ್ಳಿ ಸಮಾಜ್‌ಚ್ಚ್ ನಾಸಾಚ್ಯಾ ವಾಟೆಕ್ ವ್ಹರ್ತಾ. ಮ್ಹನಿಸ್ ಅಪ್ಲ್ಯಾ ಅಬ್ಲೆಶಿಪಣಾಕ್ ವ ಆಸ್ತಿ ಅನಿ ಗ್ರೇಸ್ತ್ ಕಾಯೆ ಖಾತಿರ್ ವ ಅಪ್ಲ್ಯಾ ಸ್ವಾರ್ಥಾ ಖಾತಿರ್ ಸಗ್ಳಿ ಸಮಾಜ್ ಅಡವ್ ದವರ್ತಾ. ಹೆ ಅಪ್ರಾದ್ ಸಾಂಪ್ರಾದಾಯಿಕ್ ಅಪ್ರಾದ್ಯಾಂಚಾಕಿ 100 % ಮಾರೆಕಾರ್. ಹೆ ಅಪ್ರಾದ್ ಸಮಾಜೆಕ್ ಎಕ್ ಪಿಡಾ ಲಾಗಲ್ಲೆ ಬರಿಂ.

ಅಸಲ್ಯಾ ಅಪ್ರಾದ್ಯಾಂ ಪಯ್ಕಿಂ ಅಮ್ಚ್ಯಾ ತರ್ನ್ಯಾಟ್ಯಾಂಕ್ ಮಾರೆಕಾರ್ ಜಾವ್ನ್ ಅಸ್ಚಿ ಸಂಗತ್ ಡ್ರಗ್ಸ್ ಅನಿ ಅಮಾಲ್ ಪದಾರ್ಥಾಂಚಿ ಪಿಡಾ. ಹ್ಯಾ ವಿಶಿಂ ಕಾನುನ್ ಕಿತೆಂ ಸಾಂಗ್ತಾ ಮ್ಹಳ್ಳೆಂ ಹಾಂಗಾಸರ್ ವಿವರ್ ದೀಂವ್ಕ್ ಪ್ರಯತನ್ ಕರ್ತಾಂ.

1985 ಇಸ್ವೆಂತ್ ಭಾರತ್ ಸರ್ಕಾರಾನ್ ‘ಅಮಾಲ್ ವಕ್ತಾಂ ಅನಿ ಮಾನಾಸಿಕ್ ದ್‌ಬರ್ಲ್ಯಾಂ ಹಾಡ್ಚ್ಯಾ ಪದಾರ್ಥಾಂ” ಕಾನುನ್ ಜ್ಯಾರಿಯೆಕ್ ಹಾಡ್ಲೆಂ. ಹ್ಯಾ ಕಾನುನಾ ಪ್ರಕಾರ್ ಭಾರತಾಂತ್ಲ್ಯಾ ಖಂಯ್ಚ್ಯಾಯ್ ವ್ಯಕ್ತಿನ್ ಕೋಕೆನ್ ವ ಪೊಪ್ಪಿನ್ ಝಡ್ ಲಾಂವ್ಕ್ ನಾಂ. ಸಾಂಗಾತಾಚ್ಚ್ ಭಲ್ಯೆಕೆಚ್ಯಾ ವಕ್ತಾಂ ವ ವ್ಯೆಜ್ನಾನಿಕ್ ವ ಕಾನುನಾಂತ್ ದಿಲ್ಲ್ಯಾ ಪರ್ವಣ್ಗೆ ಅನಿ ಪರಿಮಿತೆ ಭಾಯ್ರ್ ಕೊಣೆಂಯ್ ಭಾರತಾಂತ್ ಅಮಾಲ್ ಪದಾರ್ಥ್ ವ ಮಾನಸಿಕ್ ದ್‌ಬರ್ಲ್ಯಾಂ ಹಾಡ್ಚಿಂ ವಕ್ತಾಂ ಉತ್ಪತ್ತ್, ಉತ್ಪಾದನ್, ಕಬ್ಜೆ ಭಿತರ್ ದವರುಂಕ್, ವಿಕ್ರಾಪ್, ಮೊಲಾಕ್ ಅಪ್ಣಾಂವ್ಚೆಂ, ಶೇಕರಣ್, ಹಸ್ತಾಂತರ್, ಉಪಯೋಗ್, ಸೇವನ್, ಅಂತರಾಜ್ಯ್ ವ್ಯಾಪಾರ್, ಅಂತರಾಷ್ಟ್ ವ್ಯಾಪಾರ್, ಕರುಂಕ್ ಅಡ್ವಾರ್ಲಾಂ. ತರೀಕೀ ಅಜೂನ್ ಹ್ಯೊ ಅಮಾಲ್ ಸೇವನಾಂಚ್ಯೊ ವಸ್ತು ಅಮ್ಚೆ ಭೊಂವಾರಿ ಲಾಭ್ತಾತ್. ಸಾಂಗಾತಾಚ್ಚ್ ಅಮ್ಚೆ ಯುವಜಣ್ ಅನಿ ಭುರ್ಗಿಂ ಹಾಕಾ ಬಲಿ ಜಾತಾತ್.

ಡ್ಯುರಾಂಡ್ ದಿದಿಯಾರ್ ವಿರೋದ್ ಗೊಂಯ್ಚ್ಯಾ ರಾಜಾಚೊ ಮುಖ್ಯ ಕಾರ್ಯಾದರ್ಶಿ, ಹ್ಯಾ ದಾವ್ಯಾಂತ್ ಸುಪ್ರೀಮ್ ಕೊಡ್ತ್- ಅಮಾಲ್ ಪದಾರ್ಥಾಂಚ್ಯಾ ಕಾಳ್ಯಾ ದಂಧ್ಯಾ ವರ್ವಿಂ ಚಡಾವತ್ ತರ್ನಾಟೆ ಅನಿ ಶಿಕ್ಚ್ಯಾ ಭುರ್ಗ್ಯಾಂಚೆ ಭವಿಶ್ಯ್ ನಾಸಾಚ್ಯಾ ವಾಟೆನ್ ಅಸಾ. ಅನಿ ಹೆಂ ಹ್ಯಾ ದಿಸಾನಿಂ ಚಡಿತ್ ವಾಡ್ಲಾ ಮ್ಹಳ್ಳೊ ಹುಸ್ಕೊ ಉಚಾರ್ತಾ.

ಡ್ರಗ್ಸ್ ಸೇವನ್ ಕೆಲ್ಯಾರ್ ಮಾತ್ರ್ ಶಿಕ್ಷೆಕ್ ಒಳಗ್ ಜಾಂವ್ಚೆಂ ನ್ಹಯ್ ಬದ್ಲಾಕ್ ಎಕ್ ವ್ಯಕ್ತಿ ಡ್ರಗ್ಸ್ ವ ಹೆರ್ ಅಪ್ರಾದಾಕ್ ಒಳಗ್ ಜಾಂವ್ಚೆ ಅಮಾಲ್ ಪದಾರ್ಥ್ ಅಸೊನ್ ಅಧಿಕಾರಿಂಚ್ಯಾ ಹಾತಾಂತ್ ಸಾಂಪಡ್ತಾ ತರ್ ತ್ಯಾ ವ್ಯಕ್ತಿಕೀ ಶಿಕ್ಷಾ ಜಾತಾ.

ಅಪ್ರಾದ್ ಜಾಂವ್ಚೆ ತಸಲೆ ಡ್ರಗ್ಸ್ ಎಕಾ ವ್ಯಕ್ತಿನ್ ದೋನ್ ರೀತಿನ್ ಶೇಕರಣ್ ಕರ್ಚ್ಯಾ ವಿಶಿಂ ವಿಂಗಡಣ್ ಕರ್ಯೆತಾ. ಪಯ್ಲೆಂ ಲ್ಹಾನ್ ಮಾಪಾನ್ ಅನಿಂ ದುಸ್ರ್ಯಾನ್ ವ್ಯಾಪಾರಾಚ್ಯಾ ಉದ್ದೇಶಾನ್ ಶೇಕರಣ್ ಕರ್ಚೆ.
 


ಜರ್ ಎಕ್ ವ್ಯಕ್ತಿ ವಯ್ರ್ ಕಾಣ್ಸಿಲ್ಲ್ಯಾ ವಿವಿಧ್ ಥರಾಚ್ಯೆ ಡ್ರಗ್ಸ್ ದವರ್ನ್ ಘೆತಾ ತರ್ ತ್ಯಾ ವ್ಯಕ್ತಿಕ್ ಸಕ್ಯೆಲ್ ದಿಲ್ಲ್ಯಾ ರೀತಿಚಿ ಶಿಕ್ಷಾ ಫಾವೊ ಜಾತಾ. ಹಾಂಗಾಸರ್ ಎಕ್ ಸಂಗತ್ ಉಡಾಸ್ ದವರ್ಚಿ ಗರ್ಜೆಚಿ ಅನಿ ತಿ ಜಾವ್ನಾಸಾ- ಪರ್ವಣ್ಗಿ ನಾಸ್ತಾಂ ಖಂಯ್ಚ್ಯಾಯ್ ಮಾಪಾನ್ ಡ್ರಗ್ಸ್ ಶೇಖರಣ್ ಕರ್ಚೆ ಕಾನುನಾಚಾ ದ್ರಷ್ಟೇನ್ ಅಪ್ರಾದ್.

18 ವರ‍್ಸಾಂ ಸಕ್ಯೆಲ್ಯಾ ಭುರ್ಗ್ಯಾನಿಂ ಡ್ರಗ್ಸ್ ವ ಅಮಾಲ್ ಪದಾರ್ಥಾ ಉಪಯೋಗ್ ವ ಶೇಖರನ್ ಕೆಲಾ ತರ್ ತಾಂಕಾ ಭುರ್ಗ್ಯಾಂಚಾ ನೀತಿ ಕಾಯ್ದ್ಯಾ ಖಾಲ್ ಕಾನುನ್ ಕ್ರಮ್ ಘೆತಾತ್. ಕೊಣಿಯಿ ಎಕ್ ಭುರ್ಗೊ ವ ಭುರ್ಗೆಂ ಡ್ರಗ್ಸ್ ಸೇವನ್ ಕರ್ತಾ ತರ್ ತ್ಯಾ ವ್ಯಕ್ತಿಕ್ ಡ್ರಗ್ಸ್ ಕಾಯ್ದ್ಯಾಕಾಲ್ ಶಿಕ್ಷಾ ಜಾತಾ ಅನಿಂ ಜರ್ ಖುಶೆನ್ ತ್ಯಾ ಪಾಡ್ ಸವಯೆ ಥಾವ್ನ್ ಸುಟ್ಕಾ ಅಪ್ಣಾಂವ್ಕ್ ಅಶೆತಾ ತರ್ ತ್ಯಾ ವ್ಯಕ್ತಿಕ್ ಅಸ್ಪತ್ರೆಕ್ ದಾಖಲ್ ಕರ್ನ್ ಚಿಕಿತ್ಸಾ ದೀಂವ್ಕ್ ಕಾನುನ್ ಸೂಚನ್ ದಿತಾ ಅನಿ ತಾಕಾ ಕಾನುನಾ ಪ್ರಕಾರ್ ಶಿಕ್ಷೇಕ್ ಒಳಗ್ ಕರಿನಾ ಪುಣ್ ದಾಕ್ತೆರಾಚ್ಯಾ ಉತ್ರಾಂಕ್ ಮಾನ್ ದೀನಾಸ್ತಾ ಅರಂಭಾರ್ ವ ಮಧೆಂ ಚಿಕಿತ್ಸಾ ರಾವೊನ್ ಅಡ್ ವೆತಾ ತರ್ ತಾಕಾ ಶಿಕ್ಷಾ ಫಾವೊ ಜಾತೆಲಿ.

2.    ರ‍್ಯಾಗಿಂಗ್

ಸಾದಾರಣ್ ಜಾವ್ನ್ ಕಾಲೇಜಿಂತ್ ವ ಹೆರ್ ವಿದ್ಯಾ ಸಂಸ್ಥ್ಯಾನಿಂ ವಿದ್ಯಾರ್ಥಿ/ವಿದ್ಯಾರ್ಥಿನಿಂ ಹೆರ್ ವಿದ್ಯಾರ್ಥಿ/ವಿದ್ಯಾರ್ಥಿಂ ವಿರೊಧ್ ಕರ್ಚ್ಯಾ ಕ್ಷುಲ್ಲಕ್ ಹಾಸ್ಯಸ್ಪದ್ ಘಡಿತಾಂಕ್ ರ‍್ಯಾಗಿಂಗ್ ಮ್ಹಣ್ತಾತ್. ಪುಣ್ ಅಜ್ ಹೆಂ ಹಾಸ್ಯಸ್ಪದ್ ವ ಜೋಕ್ ಜಾವ್ನ್ ಉರೊಂಕ್ ನಾಂ ಬದ್ಲಾಕ್ ಎಕ್ ಅಪ್ರಾದ್ ಜಾಂವ್ಕ್ ಪಾವ್ಲಾ.

    ಅಂಧ್ರ ಪದೇಶ್ ಸರ್ಕಾರಾನ್ ಚಾಲ್ತಿ ಹಾಡಲ್ಲ್ಯಾ ರ‍್ಯಾಗಿಂಗ್ ಅಡ್ವರ್ಚೆ ಕಾನುನ್ 1997 (Andhra Pradesh Prohibition of Ragging Act, 1997 (Act no. 26 of 1997) ವ್ಯಾ ಪ್ರಕಾರ್- ರ‍್ಯಾಗಿಂಗ್ ಮ್ಹಳ್ಯಾರ್ ಎಕಾ ವಿದ್ಯಾರ್ಥಿಕ್ ಅವ್‌ಮರ‍್ಯಾದ್ ವ ಅಕ್ಮಾನ್ ಕರ್ಚೆ ತಸಲೆ ವ ಭಿಂಯಾನ್ ಜಿಯಂವ್ಚೆ ತಸಲೆಂ ವಾತಾವರಣ್ ಸ್ರಷ್ಠಿ ಕರ್ಚೆಂ ವ ತಾಚ್ಯಾ/ತಿಚ್ಯಾ ಜಿವಾಕ್ ವ ನಾಂವಾಂಕ್ ಕಳಂಕ್ ಹಾಡ್ಚೆ ತಸಲಿಂ ಕರ್ತುವಾಂ ಅನ್ಯೇಕಾ ವಿದ್ತಾರ್ಥಿನ್ ಕರ್ಚೆ.(“Ragging” means doing an act which causes or is likely to cause insult or annoyance of fear or apprehension or threat or intimidation or outrage of modesty or injury to a student.'')

    ಪ್ರಸ್ತುತ್ ಸಭಾರ್ ರಾಜ್ಯಾನಿಂ ರ‍್ಯಾಗಿಂಗಾ ವಿರೋಧ್ ಕಾನುನ್ ಜ್ಯಾರಿ ಕೆಲಾ. ದಾಖ್ಲ್ಯಾಕ್, ತಮಿಳ್ನಾಡಾಂತ್ 1997 oತ್, ಅಂಧ್ರ ಪ್ರದೇಶಾಂತ್  1997 oತ್, ಮಹರಾಷ್ಟ್ರಾಂತ್  1999 oತ್ ಅಸಲೆಂ ಕಾನುನ್ ಜ್ಯಾರಿಯೆಕ್ ಹಾಡ್ಲಾ.

    ಪ್ರಸ್ತುತ್ ಅಸ್ತಿತ್ವಾಂತ್ ಅಸ್ಚ್ಯಾ ರ‍್ಯಾಗಿಂಗ್ ವಿರೋಧಿ ಕಾನುನಾ ಪ್ರಕಾರ್ ರ‍್ಯಾಗಿಂಗ್ ಅಪ್ರಾದಾಂತ್ ಸಾಂಪಡ್ಲ್ಯಾರ್ ಶಿಕ್ಷ್ಯಾ ಅಶಿ ಅಸಾ-

1. ರ‍್ಯಾಗಿಂಗ್ ಕೆಲ್ಲೆ ವರ್ವಿಂ ಜರ್ ಎಕ್ ವ್ಯಕ್ತಿ ಹಾಸ್ಯಾಸ್ಪದ್ ಸನ್ನಿವೇಶಾಕ್ ಒಳಗ್ ಜಾತಾ ವ ತಾಚ್ಯಾ/ತಿಚ್ಯಾ ಮರ‍್ಯಾದೆಕ್ ಉಣ್ ಯೆತಾ ತರ್ ರ‍್ಯಾಗಿಂಗ್ ಕೆಲ್ಲ್ಯಾ ವ್ಯಕ್ತಿಕ್ 6 ಮಹಿನೆ ಪರ‍್ಯಾಂತ್ ಜ್ಯೇಲಾಚಿ ಶಿಕ್ಷಾ ವ ರು. 1000 ಪರ‍್ಯಾಂತ್ ದಂಡ್ ವ ದೋನಿ ಶಿಕ್ಷಾ ಫಾವೊ ಜಾತಾ.
2. ರ‍್ಯಾಗಿಂಗ್ ಕರ್ಚೊ ವ್ಯಕ್ತಿ ರ‍್ಯಾಗಿಂಗಾಕ್ ಒಳಗ್ ಜಾಂವ್ಚ್ಯಾ ವ್ಯಕ್ತಿಚ್ಯಾ ಜೀವಾಕ್ ಬೆದರಿಕೆ ದಿತಾ ವ ಹೆರ್ ತಸಲೆಂ ಭೆಂ ಯೆಂವ್ಚೆ ಬರಿ ಕರ್ತಾ ತರ್ ರ‍್ಯಾಗಿಂಗ್ ಕೆಲ್ಲ್ಯಾ ವ್ಯಕ್ತಿಕ್ 1 ವರ್ಸ್ ಪರ‍್ಯಾಂತ್ ಜ್ಯೇಲಾಚಿ ಶಿಕ್ಷಾ ವ ರು. 2000 ಪರ‍್ಯಾಂತ್ ದಂಡ್ ವ ದೋನಿ ಶಿಕ್ಷಾ ಫಾವೊ ಜಾತಾ.
3. ರ‍್ಯಾಗಿಂಗ್ ಕರ್ಚೊ ವ್ಯಕ್ತಿ ರ‍್ಯಾಗಿಂಗಾಕ್ ಒಳಗ್ ಜಾಂವ್ಚ್ಯಾ ವ್ಯಕ್ತಿಕ್ ಕಾನುನ್ ಬಾಹಿರ್ ಬಂಧಡೆಂತ್ ದವರ್ತಾ ವ ಘಾಯ್ ಕರ್ತಾ ತರ್ ರ‍್ಯಾಗಿಂಗ್ ಕೆಲ್ಲ್ಯಾ ವ್ಯಕ್ತಿಕ್ 2 ವರ್ಸಾಂ ಪರ‍್ಯಾಂತ್ ಜ್ಯೇಲಾಚಿ ಶಿಕ್ಷಾ ವ ರು. 5000 ಪರ‍್ಯಾಂತ್ ದಂಡ್ ವ ದೋನಿ ಶಿಕ್ಷಾ ಫಾವೊ ಜಾತಾ.
4. ರ‍್ಯಾಗಿಂಗ್ ಕರ್ಚೊ ವ್ಯಕ್ತಿ ರ‍್ಯಾಗಿಂಗಾಕ್ ಒಳಗ್ ಜಾಂವ್ಚ್ಯಾ ವ್ಯಕ್ತಿಚೆರ್ ಮಾರಾಣಾಂತಿಕ್ ಹಲ್ಲೊ ವ ಅತ್ಯಾಚಾರ್ ಕರ್ತಾ ವ ಕಿಡ್ನ್ಯಾಪ್ ಕರ್ತಾ ವ ಧಾಂವೊನ್ ವೆಚೆ ತಸಲೆಂ ಸನ್ನಿವೇಶ್ ರುತಾ ಕರ್ತಾ ತರ್ ರ‍್ಯಾಗಿಂಗ್ ಕೆಲ್ಲ್ಯಾ ವ್ಯಕ್ತಿಕ್ 5 ವರ್ಸಾಂ ಪರ‍್ಯಾಂತ್ ಜ್ಯೇಲಾಚಿ ಶಿಕ್ಷಾ ವ ರು. 10,000 ಪರ‍್ಯಾಂತ್ ದಂಡ್ ಶಿಕ್ಷಾ ಫಾವೊ ಜಾತಾ.
5. ರ‍್ಯಾಗಿಂಗ್ ಕರ್ಚೊ ವ್ಯಕ್ತಿ ರ‍್ಯಾಗಿಂಗಾಕ್ ಒಳಗ್ ಜಾಂವ್ಚ್ಯಾ ವ್ಯಕ್ತಿಚಿ ಖುನಿ ಕರ್ತಾ ವ ಜಿವ್ಘಾತ್ ಕರ್ಚೆ ತಸಲೆಂ ಸನ್ನಿವೇಶ್ ಅಸಾ ಕರ್ತಾ ತರ್ ರ‍್ಯಾಗಿಂಗ್ ಕೆಲ್ಲ್ಯಾ ವ್ಯಕ್ತಿಕ್ 10 ವರ್ಸಾಂ ಪರ‍್ಯಾಂತ್ ಜ್ಯೇಲಾಚಿ ಶಿಕ್ಷಾ ವ ರು. 50,000 ಪರ‍್ಯಾಂತ್ ದಂಡ್ ಶಿಕ್ಷಾ ಫಾವೊ ಜಾತಾ.

ಸಾಂಗಾತಾಚ್ ಜರ್ ಎಕ್ ಭುರ್ಗೊ ವ ಭುರ್ಗೆಂ ರ‍್ಯಾಗಿಂಗಾಚಾ ಅಪ್ರಾದಾಕ್ ಒಳಗ್ ಜಾವ್ನ್ ಶಿಕ್ಷೆಕ್ ಒಳಗ್ ಜಾತಾ ತರ್ ತೊ ಭುರ್ಗೊ ವ ಭುರ್ಗೆಂ ತ್ಯಾ ಶಿಕ್ಷಣ್ ಸಂಸ್ಥ್ಯಾ ಥಾವ್ನ್ ಅಮಾನತ್ ಜಾತಾ ಅನಿಂ ಜರ್ ತೊ/ತೆಂ ಭುರ್ಗೊ ವ ಭುರ್ಗೆಂ 6 ಮಹಿನ್ಯಾಚಾಕಿ ಚಡ್ ವೆಳಾಚಾ ಜ್ಯೇಲಾಚಾ ಶಿಕ್ಶೆಕ್ ಒಳಗ್ ಜಾತಾ ತರ್ ತ್ಯಾ ಭುರ್ಗ್ಯಾಕ್ ಖಂಯ್ಚ್ಯಾಯ್ ಶಿಕ್ಷಣ್ ಸಂಸ್ಥ್ಯಾಂತ್ ಶಿಕೊಂಕ್ ಅವ್ಕಾಸ್ ಅಸ್ಚೊ ನಾ.