ಮಾ. ಬಾಪ್. ಫ್ರಾನ್ಸಿಸ್ ಅಸ್ಸಿಸಿ ಅಲ್ಮೇಡಾ,
ಯಾಜಕ್ ಅನಿ ವಕೀಲ್ (ಮಂಗ್ಳುರ್ ದಿಯೆಸೆಜ್)


ಪ್ರಸ್ತಾವನ್:
    ಬೊರ‍್ಯಾ ಭಲಾಯ್ಕೆನ್ ಜಿಯೆಂವ್ಚೆ ಮ್ಹನ್ಶ್ಯಾಹಕ್ಕ್. 1948 ಚ್ಯಾ ಮ್ಹನ್ಶ್ಯಾಹಕ್ಕಾಂಚೆರ್ ಸಾರ್ವತ್ರೀಕ್ ಪರ್ಗಟ್ಣೇಚ್ಯಾ ಅನುಛ್ಛೇದ್ 25 ಂತ್ (Article 25 of Universal Declaration on Human Rights 1948) ಹರೇಕಾ ವ್ಯಕ್ತಿನ್ ಅನಿಂ ತಾಚ್ಯಾ ಕುಟ್ಮಾನ್ ಪಿಡೆಂತ್, ಉಣ್ ಅಸಲ್ಯಾ ವೆಳಿಂ ವ ಪ್ರಾಯೆಸ್ತ್ ಜಾವ್ನ್ ಕಷ್ಟಾಂತ್ ಅಸಲ್ಲ್ಯಾ ವೆಳಾರ್ ಬರ‍್ಯಾ ಭಲಾಯ್ಕೆನ್ ಜಿಯೆಂವ್ಕ್ ಗರ್ಜ್ ಅಸ್ಚಿ ವಕ್ತಾಂ ಅನಿಂ ಹೆರ್ ಸರ್ವ್ ಸ್‌ಲತಾಯ್ ಅಪ್ಣಾವ್ನ್ ಸಂಪೂರ್ಣ್ ಜಿವಿತ್ ಜಿಯೆಂವ್ಚೆಂ ಹಕ್ಕ್ ಅಸಾ ಮ್ಹಣ್ತಾ. ಸಾಂಗಾತಾಚ್ಚ್ ಅಂತರಾಸ್ಟ್ರಿಯ್ ಮಟ್ಟಾರ್ ಅರ್ಥಿಕ್, ಸಾಮಾಜಿಕ್ ಅನಿಂ ಸಾಂಸ್ಕ್ರತಿಕ್ ಹಕ್ಕಾಂಚೆರ್ ಕೆಲ್ಲ್ಯಾ ಕರರಾಚ್ಯಾ ಅನುಛ್ಛೇದ್ 12 (Article 12 of the International Covenant on Economic, Social and Cultural Rights, 1966) ಂತ್ ಅಶೆಂ ಸಾಂಗ್ಲಾ- ಹರೇಕಾ ವ್ಯಕ್ತಿನ್ ಕಿತ್ಲ್ಯಾ ಉಂಚ್ಲ್ಯಾ ಮಟ್ಟಾರ್ ದ್ಯೇಹಿಕ್ ಅನಿಂ ಮಾನಸಿಕ್ ಭಲಾಯ್ಕಿ ಅಪ್ಣಾಂವ್ಕ್ ಸಾದ್ಯ್ ಅಸಾ ತಿತ್ಲ್ಯಾ ಮಟ್ಟಾರ್ ತಿ ಅಪ್ಣಾಂವ್ಚೊ ಹಕ್ಕ್ ಅಸಾ. ಭಾರತಾಚ್ಯಾ ಸಂವಿಂಧಾನಾಚ್ಯಾ ಅನುಛ್ಛೇದ್ 21 ಪ್ರಕಾರ್ ಬರಿ ಭಲಾಯ್ಕಿ ಮ್ಹನ್ಶ್ಯಾಚೆಂ ಮುಳಾವೆಂ ಹಕ್ಕ್ (Fundamental Right). ಸುಪ್ರೀಮ್ ಕೋಡ್ತಿನ್ ಸಬಾರ್ ದಾವ್ಯಾನಿಂ ಬರಿ ಭಲಾಯ್ಕಿ ಅಪ್ಣಾಂವ್ಚೆ ಮುಳಾವೆಂ ಹಕ್ಕ್ ಮ್ಹಳ್ಯಾ ವಿಶಿಂ ನ್ಯಾಯ್ ನಿರ್ಣಯ್ ದಿಲಾ. ಪ್ರಸ್ತುತ್ ಕಾಳಾರ್ ಭಲಾಯ್ಕೆಚಿ ಜತನ್ ವ್ಯೇದ್ಯಕೀಯ್ ಮಾತ್ರ್ ನ್ಹಯ್ ಬದ್ಲಾಕ್ ಸಾಮಾಜಿಕ್- ವ್ಯೆದ್ಯಕೀಯ್ ಜಾಂವ್ಕ್ ಪಾವ್ಲಾ. ತಶೆಂ ಮ್ಹಳ್ಯಾರ್ ವಕ್ತಾಂ ಸಾಂಗಾತ್ ಸಾಮಾಜಿಕ್ ಜತನ್ ಪ್ರಮುಖ್ ಸ್ಥಾನ್ ಘೆತಾ.

ದಾಕ್ತೆರಾಂಚೆ ಕಾಯ್ದೆ ಅನಿಂ ಹಕ್ಕಾಂ:
1.    ದಾಕ್ತೆರಾನ್ ಖಂಯ್ಚೊಚ್ ಭೇದ್ ಭಾವ್ ನಾಸ್ತಾಂ ಹರೇಕಾ ಪಿಡೆಸ್ತಾಕ್ ವಯ್ಜಾಕೀಯ್ ಸೇವಾ ದಿಂವ್ಚಿ.

2.    ದಾಕ್ತೆರಾನ್ ಅಪ್ಣಾಲಾಗಿಂ ಅಯಿಲ್ಲ್ಯಾ ಪಿಡೆಸ್ತಾಚ್ಯಾ ಭಲಾಯ್ಕೆಚಿ ಸಂಪೂರ್ಣ್ ಥರಾನ್ ಜತನ್ ಘೆಂವ್ಚಿ.

3.    ಪಿಡೆಸ್ತ್ ಎಕಾ ವಯ್ಜಾಕಡೆಂ ಭಲಾಯ್ಕೆಚಿ ಸೂಚನಾಂ ವಿಚಾರುಂಕ್ ಘೆಲ್ಲ್ಯಾ ವೆಳಿಂ ತ್ಯಾ ಪಿಡೆಸ್ತಾಕ್ ತಾಚಿ ಜತನ್ ದೀಂವ್ಕ್ ಒಪ್ಲ್ಯಾ ಉಪ್ರಾಂತ್ ತಾಕಾ ಗರ್ಜ್ ಅಸ್ಚಿ ಸಲಹಾ ದಿಂವ್ಚಿ ತಾಚೊ ಕಾಯ್ದೊ. ದಾಖ್ಲ್ಯಾಕ್, ಖಂಯ್ಚಿ ವಕ್ತಾಂ ಘೆಂವ್ಚಿ, ಕೆದಾಳಾ, ಕಶೆಂ ಅನಿ ಕಿತ್ಲ್ಯಾ ಮಾಪಾನ್.

4.    ವಯ್ಜಾಕ್, ತ್ಯಾ ಪಿಡೆಸ್ತಾಕ್ ಅಪ್ಣಾ ವರ್ವಿಂ ಒಕಾತ್ ದೀಂವ್ಕ್ ಸಾದ್ಯ್ ನಾಂ ಮ್ಹಣ್ ಭೊಗ್ತಾ ತರ್ ಜಾತಾ ತಿತ್ಲ್ಯಾ ವೆಳಾ ಭಿತರ್ ಹೆರ್ ವಯ್ಜಾಚಿ ಸಲಹಾ ವಿಚಾರುಂಕ್ ಸೂಚನ್ ದೀಂವ್ಚೆ.

5.    ಎಕಾ ವಯ್ಜಾಕ್ ಸಾಮಾನ್ಯ್ ವಯ್ಜಾಂಕ್ ಅಸಾಜೆ ಜಾಲ್ಲಿ ಸಾಮಾನ್ಯ್ ಜಾಣ್ವಾಯ್ ಅಸೊಂಕ್ ಜಾಯ್ ಅನಿಂ ಅಸಲ್ಯಾ ವಯ್ಜಾನ್ ಮಾತ್ರ್ ಪಿಡೆಸ್ತಾಂಕ್ ಸಲಹಾ ದೀಂವ್ಕ್ ಸಾದ್ಯ್ ಅಸಾ.

6.    ಎಕಾ ವಯ್ಜಾನ್ ತಾಚ್ಯಾ ಹಾತಾಖಾಲ್ ಅಸಲ್ಲ್ಯಾ ಪಿಡೆಸ್ತಾಕ್ ಸಂಪೂರ್ಣ್ ಅನಿಂ ಖಂಡಿತ್ ಗೂಣ್ ಕರ್ತಾಂ ಮ್ಹಳ್ಳೊ ಭರ್ವಸೊ ದೀಜಾಯ್ ಮ್ಹಣ್ ನಾಂ.

7.    ಎಕಾ ವಯ್ಜಾನ್ ಅಲಕ್ಷ್ಯಾ/ನಿರ್ಲಕ್ಷಾ ಕರ‍್ನಾಸ್ತಾಂ  ಪಿಡೆಸ್ತಾಚಾ ಪಿಡೆ ವಿಶಿಂ ಚೂಕ್ ಅಬಿಪ್ರಾಯ್ ದಿಲಿ ತರ್ ತ್ಯಾ ಚೂಕ್ ಅಬಿಪ್ರಾಯೆ ಖಾತಿರ್ ತ್ಯಾ ವಯ್ಜಾನ್ ಅಲಕ್ಷ್ಯಾ ಕೆಲಾ ಮ್ಹಣ್ ಚೂಕಿದಾರ್ ಕರುಂಕ್ ಜಾಯ್ನಾ.

8.     ಎಕ್ ಪಿಡೆಸ್ತ್ ವಯ್ಜಾಲಾಗಿಂ ಅಯಿಲ್ಯಾ ವೆಳಿಂ ಸಾಮಾನ್ಯ್ ರೀತಿಚಿ ಚಿಕಿತ್ಸ್ಯಾ (Ordinary Treatment) ದೀಂವ್ಕ್ ಕಾಯ್ದೊ ಅಸಾ ಶಿವಾಯ್ ಅಸಮಾನ್ಯ್ ರೀತಿಚಿ ಚಿಕಿತ್ಸ್ಯಾ (Extra-Ordinary Treatment)ದೀಜಾಯ್ ಮ್ಹಣ್ ನಾಂ.

9.    ಎಕ್ ವಯ್ಜ್ ಎಕಾ ಪಿಡೆಸ್ತಾಕ್ ಸಲಹಾ ದೀವ್ನ್ ವಕಾತ್ ದೀತಾ ತರ್ ಮುಕಾರ್ ಜಾಂವ್ಕ್ ಅಸ್ಚ್ಯಾ ಸಾಮಾನ್ಯ್ ಪರಿಣಾಮಾಚೆಂ ಸೂಚನ್ ಅನಿಂ ಮಾಹೆತ್ ದೀಂವ್ಚೊ ಕಾಯ್ದೊ ಅಸಾ.

ಪ್ರಸ್ತುತ್ ದಾಕ್ತೆರಾಂ ವಿರೋದ್ ಅಸ್ಚೆ ಅಪ್‌ವಾದ್ ಕಸಲೆ?
    ಪ್ರಸ್ತುತ್ ಕಾಳಾರ್ ವಯ್ಜಾಕೀಯ್ ಕ್ರಾಂತಿ ಅಕಾಸಾಕ್ ಪಾವ್ಲಾ ತರೀ, ವಯ್ಜಾ ವಿಶ್ಯಾಂತ್ ಅನಿಂ ತಾಂಚಾ ಅಲಕ್ಷೆ ವಿಶ್ಯಾಂತ್ ಸಬಾರ್ ರೀತಿಂಚೆ ಅಪ್‌ವಾದ್ ಅಯ್ಕಾತಾಂವ್. ದಾಖ್ಲ್ಯಾಕ್- ಪಯ್ಶ್ಯಾಖಾತಿರ್ ಕಿಡ್ನಿ ಅನಿಂ ಹೆರ್ ಅಂಗ್ ಕಾಡ್ನ್ ವಿಕ್ಚೆ, ಲ್ಹಾನ್ ಒಪರೇಶನಾಂ ದ್ವಾರಿಂ ಗೂಣ್ ಕರ್ಚಿ ಪಿಡಾ ಗರ್ಜ್ ನಾಸ್ತಾಂ ಅನಿಂ ಪಯ್ಶ್ಯಾಂ ಖಾತಿರ್ ಗಂಭೀರ್ ಕರ್ಚಿಂ, ನಯ್ಸರ್ಗಿಕ್ ರೀತಿನ್ ಜಾಂವ್ಚೆ ಬಾಳ್ತೆರ್ ಒಪರೇಶನಾ ದ್ವಾರಿ ಕರ್ಚೆ, ಅಲಕ್ಷ್ಯಾ ಕರ್ನ್ ಮ್ಹನ್ಶ್ಯಾನ್ ಜೀವ್ ಹೊಗ್ಡಾಂವ್ಕ್ ಕಾರಣ್ ಜಾಂವ್ಚೆ, ದುಬ್ಳ್ಯಾ ಲೊಕಾಂಕ್ ಗುಮಾನ್ ದಿನಾಸ್ತಾಂ ಗ್ರೇಸ್ತಾಂಕ್ ಮಾತ್ರ್ ವಯ್ಜಕೀಯ್  ಸ್‌ಲತ್ಯೊ ಸೀಮಿತ್ ಮ್ಹಳ್ಳೆ ಪರಿ ಚಲಂವ್ಚೆ, ಇತ್ಯಾದಿ.

    ಥೊಡ್ಯಾ ಸಂದರ್ಭಾನಿಂ ಕುಟ್ಮಾ ವಯ್ಜಾನ್(ಫ್ಯಾಮಿಲಿ ದಾಕ್ತರ್) ಹೆರ್ ಪರಿಣಿತ್ ವಯ್ಜಾಂ ಸಾಂಗಾತಾ ಮೆಳೊನ್ ಪಯ್ಶ್ಯಾಂ ಖಾತಿರ್ ಗರ್ಜ್ ನಾತಲ್ಲಿಂ ಒಪರೇಶನಾಂ ಕರಯಿಲ್ಲೆ ಸಬಾರ್ ದಾಖ್ಲೆ ಅಸಾತ್. ಥೊಡ್ಯಾ ವರ್ಸಾಂ ಪುರ್ವಿಂ ವಯ್ಜಾನ್ ತಾಚ್ಯಾ ಪಿಡೆಸ್ತಾಚಿ ಅಸ್ತ್ ಅಪ್ಣಾಂವ್ಚೆ ಪಾಸತ್ ಅಪ್ಲ್ಯಾ ಪಿಡೆಸ್ತಾಚಿ ಖುನಿ ಕೆಲ್ಲೆಂ ಘಡಿತ್ ಅಸಾ.

ಪಿಡೆಸ್ತಾಚಿಂ ಹಕ್ಕಾಂ ಅನಿಂ ಕಾಯ್ದೆ:

1.    ಪಾತ್ಯೆಣೆನ್ ವಯ್ಜಾಚಿ ಸಲಹಾ ಅಪ್ಣಾವ್ನ್ ವಯ್ಜಾಚ್ಯಾ ಹಾತಾಂತ್ ಅಪ್ಲ್ಯಾ ಭಲಾಯ್ಕೆಚಿ ಸಂಪೂರ್ಣ್ ಜವಾಬ್ದಾರಿ ಘಾಲ್ಲ್ಯಾ ವೆಳಿಂ ತ್ಯಾ ವಯ್ಜಾ ಥಾವ್ನ್ ಸಾಮಾನ್ಯ್ ಪ್ರಮಾಣಾಚ್ಯಾ ಭಲಯ್ಕೆಚಿ ಸೂಚನಾಂ ಅಪ್ಣಾಂವ್ಚೊ ಹಕ್ಕ್ ಪಿಡೆಸ್ತಾಕ್ ಅಸಾ.

2.    ವಯ್ಜಾಚಾ ಅಲಕ್ಷೆವರ್ವಿಂ ಅಪ್ಣಾಚಿ ಭಲಾಯ್ಕಿ ಹೊಗ್ಡಾಯ್ತಾ ತರ್ ತ್ಯಾ ವಯ್ಜಾ ವೀರೊದ್ ಕೊಡ್ತಿ ಥಾವ್ನ್ ಪರಿಹಾರ್ ಅಪ್ಣಾಂವ್ಚೆ ಹಕ್ಕ್ ಅಸಾ.

3.    ಎಕ್ ಸರ್ಜರಿಕ್ ಒಳಗ್ ಜಾಂವ್ಚ್ಯಾ ಫುಡೆಂ ವಯ್ಜಾನ್ ಒಪ್ಪಿಗಿ ದೀಂವ್ಚಿ ಗರ್ಜ್. ಒಪ್ಪಿಗಿ ದೀಂವ್ಚ್ಯಾ ಫುಡೆಂ ತ್ಯಾ ಸರ್ಜರಿಚೆ ಸಾಮಾನ್ಯ್ ಪರಿಣಾಮಾಂಚೊ ವಿವರ್ ಅಪ್ಣಾಂವ್ಚೆಂ ಹಕ್ಕ್ ಅಸಾ.

4.    ವಯ್ಜಾನ್ ದಿಲ್ಲಿ ಸೂಚನಾಂ ಸಂಪೂರ್ಣ್ ಪಾಲನ್ ಕರ್ಚೊ ಕಾಯ್ದೊ ಪಿಡೆಸ್ತಾಚೊ.

5.    ಖಂಯ್ಚೆಯ್ ಒಪರೇಶನ್ ಕರ್ಚ್ಯಾ ಪಯ್ಲೆಂ ತ್ಯಾ ಒಪರೇಶನಾ ಥಾವ್ನ್ ಜಾಂವ್ಚಾ ಪರಿಣಾಮಾ ವಿಶಿಂ ಸಮ್ಜಣಿಂ ದೀಂವ್ನ್ ತ್ಯಾ ಪಿಡೆಸ್ತಾ ಥಾವ್ನ್ ಒಪ್ಪಿಗಿ ಕಾಣ್ಘೆಂವ್ಕ್‌ಜಾಯ್. ಜರ್ ಪಿಡೆಸ್ತ್ ತಿ ಸಮ್ಜಣಿ ಕಾಣ್ಘೆಂವ್ಚಾ ಪರಿಸ್ಥಿತೆರ್ ನಾಂ ತರ್ ತಾಚಾ ಲಾಗ್ಸಿಲ್ಯಾ ಕುಟ್ಮಾದಾರಾಂಕ್ ತಿಳ್ಸುಂಕ್‌ಜಾಯ್. ಹೊ ವಯ್ಜಾಂಚೊ ಕಾಯ್ದೊ.

ಅಸ್ಪತ್ರೆನ್ ಅನಿಂ ದಾಕ್ತೆರಾನಿಂ ಪಾಲನ್ ಕರಿಜೆ ಜಾಲ್ಲಿಂ ಸಾಮಾನ್ಯ್ ನಿಯಮಾಂ:

1.    ಎಕ್ ಪಿಡೆಸ್ತ್ ಅಸ್ಪತ್ರೆಂತ್ ದಾಖಲ್ ಜಾಲ್ಯಾ ಉಪ್ರಾಂತ್ ತ್ಯಾ ಅಸ್ಪತ್ರೆಚ್ಯಾ ವಯ್ಜಾನಿಂ ಅನಿಂ ಹೆರ್ ವಯ್ಜಾಕೀಯ್ ಸಹಾಯಕಾನಿಂ ಪಿಡೆಸ್ತಾಚ್ಯಾ ಸವಾಲಾಂಕ್ ಜಾಪ್ ದೀಂವ್ಚೊ ಕಾಯ್ದೊ ಅಸಾ.

2.    ವಯ್ಜಾನಿಂ ಪಿಡೆಸ್ತಾಂಕ್ ಅರ್ಥ್ ಜಾಂವ್ಚ್ಯಾ ರೀತಿನ್ ಪಿಡೆಸ್ತಾಂಚಾ ಪಿಡೆ ವಿಶ್ಯಾಂತ್ ವಿವರ್ ದೀಂವ್ಕ್ ಅಸಾ ಅನಿ ತ್ಯಾ ಪಿಡೆಸ್ತಾಕ್ ದಾಖಲ್ ಕೆಲ್ಲ್ಯಾ ಉಪ್ರಾಂತ್ ತಾಚಿ ಜತನ್ ಘೆಂವ್ಚೊ ಕಾಯ್ದೊ ತ್ಯಾ ಅಸ್ಪತ್ರೆಚೊ ಅನಿಂ ವಯ್ಜಾಂಚೊ.

3.    ಎಕಾ ಅಸ್ಪತ್ರೆಂತ್ ಸೇವಾ ದೀಂವ್ಚ್ಯಾ ವಯ್ಜಾಂಚಾ ಅನಿ ಹೆರ್ ಶಿಬಂದೆಂಚ್ಯಾ ಅಲಕ್ಷೆಕ್/ನಿರ್ಲಕ್ಷೆಕ್ ತಿ ಅಸ್ಪತ್ರ್ ಜವಬ್ದಾರ್ ಜಾತಾ.

4.    ವಯ್ಜಾನಿಂ ಪಿಡೆಸ್ತಾಚಿ ವಯ್ಜಾಕೀಯ್ ವರ್ದಿ ಜಾತಾ ತಿತ್ಲ್ಯಾ ಮಾಪಾನ್ ಉಗ್ತ್ಯಾನ್ ಮಾಂಡುನ್ ಹಾಡುಂಕ್ ಪ್ರಯತನ್ ಕರಿಜೆ.

5.    ಅಸ್ಪತ್ರೆಚ್ಯಾ ಸಿಬಂದೆನ್ ಅನಿಂ ವಯ್ಜಾನಿಂ ಮ್ಹನ್ಶ್ಯಾ ಪಣಾನ್ ಎಕಾ ಪಿಡೆಸ್ತಾಕ್ ಪಳೆಜಾಯ್ ಶಿವಾಯ್ ಉದ್ಯಮಾಚಾ ದ್ರಷ್ಟೇನ್ ದೆಖೊಂಕ್ ನಜೊ.

ದಾಕ್ತೆರಾಚ್ಯಾ ಅಲಕ್ಷೆ ವರ್ವಿಂ ಪಿಡೆಸ್ತಾಕ್ ಅನ್ಯಾಯ್ ಜಾಲ್ಲ್ಯಾ ವೆಳಾರ್ ಪಿಡೆಸ್ತಾಕ್ ಅಸ್ಚ್ಯೊ ಪರಿಹಾರಾಚ್ಯೊ ವಾಟೊ:
    ವಯ್ಜಾಕೀಯ್ ಪರಿಣತಾ ಸೇವೆಕ್ ಪೂರಕ್ ಜಾಂವ್ಚ್ಯಾ ತಸಲಿ ಜಾವ್ನಾಸಾ ದೆಕುನ್ ಹೆಂ ಸಮಾನ್ಯ್ ಉದ್ಯಮ್ ನ್ಹಯ್. ಪೂಣ್ ಥೊಡ್ಯಾ ವಯ್ಜಾಂಚಾ ಅಬ್ಲೆಸ್ ಪಣಾ ವರ್ವಿಂ ಪ್ರಸ್ತುತ್ ಕಾಳಾರ್ ಹೆಂ ಎಕ್ ಉದ್ಯಮ್ ಜಾಂವ್ಕ್ ಪಾವ್ಲಾ. ವಯ್ಜ್ ಅಸ್ಚೆ ಪಯ್ಶೆ ಕರುಂಕ್, ದುಬ್ಳ್ಯಾಂಕ್ ಶೋಷಣ್ ಕರುಂಕ್, ವಯ್ಜ್ ಮ್ಹನ್ಶ್ಯಾ ಪಣ್ ಹೊಗ್ಡಾಯಿಲ್ಲೊ ವ್ಯಕ್ತಿ, ಅಸಲಿಂ ಅನಿ ಹೆರ್ ಅಪ್‌ವಾದಾಂ ಎಕಾ ವಯ್ಜಾ ವಿಶ್ಯಾಂತ್ ಅಯ್ಕಾತಾಂವ್. ಎಕಾ ವಯ್ಜಾನ್ ಅಪ್ಲ್ಯಾ ಲಾಗಿಂ ಅಯಿಲ್ಯಾ ಪಿಡೆಸ್ತಾ ಥಂಯ್ ಮ್ಹನ್ಶ್ಯಾಪಣ್ ದಾಖಯ್ಲೆಂ ತರ್ ತೊ ಪಿಡೆಸ್ತ್ ಅರ್ದೊ ಗೂಣ್ ಜಾತಾ.

    ಹರೇಕಾ ಸಂದರ್ಬಾರ್ ಪಿಡೆಸ್ತಾಚಾ ಭಲಾಯ್ಕೆಂತ್ ಅಡ್ ಪರಿಣಾಮ್ ಜಾಲ್ಲ್ಯಾ ವೆಳಿಂ ವಯ್ಜ್ ಚೂಕಿದಾರ್ ಜಾಯ್ನಾ ಬದ್ಲಾಕ್, ವಯ್ಜಾಚಾ ಅಲಕ್ಷೇ/ನಿರ್ಲಕ್ಷೆ ವರ್ವಿಂ ಪಿಡೆಸ್ತಾಚೆರ್ ಪರಿಣಾಮ್ ಜಾಲ್ಯಾ ವೆಳಿಂ ವಯ್ಜ್ ಚೂಕಿದಾರ್ ಜಾಂವ್ಕ್ ಪಾವ್ತಾ.

  • ಥೊಡೆ ಕ್ರಿಮಿನಲ್ ನಿರ್ಲಕ್ಷೆಚೆಂ ದಾಖ್ಲೆ- ಸರ್ಜೆರಿ ಕೆಲ್ಯಾ ಉಪ್ರಾಂತ್ ಖಂಯ್ಚಿಯ್ ಸರ್ಜರಿಚಿ ಅಯ್ದಾಂ ಪಿಡೆಸ್ತಾಚಾ ಕುಡಿಂತ್ ಸೊಡ್ಚಿಂ, ಗರ್ಜೆ ಭಾಯ್ರ್ ಕುಡಿಚೊ ವಿಶ್ವೊ ಕಾಡ್ಚೊ, ಚೂಕ್ ಸಮ್ಜಣಿ ದೀವ್ನ್ ಪಯ್ಶಾ ಖಾತಿರ್ ಒಪರೇಶನ ಕರ್ಚಿಂ, ಇತ್ಯಾದಿ
  • ದಾಕ್ತೆರಾಚ್ಯಾ ನಿರ್ಲಕ್ಷೆ ವರ್ವಿಂ ಪಿಡೆಸ್ತ್ ಮರಣ್ ಪಾವ್ಲಾ ತರ್ ಭಾರತೀಯ್ ದಂಡಸಂಹಿತೆಚ್ಯಾ ಕಲಂ 304-ಅ ಪ್ರಕಾರ್ ಕಾನುನಾಖಾಲ್ ಚೂಕಿದಾರ್ ಜಾತಾ.
  • ಹ್ಯಾ ಸಂದರ್ಬಿ ಜರ್ ವಯ್ಜಾಚಿ ಚೂಕ್ ಕೊಡ್ತಿಂತ್ ರುಜು ಜಾತಾ ತರ್ ವಯ್ಜಾನ್ ತ್ಯಾ ಪಿಡೆಸ್ತಾಕ್/ಕುಟ್ಮಾಚಾಂ ಸೂಕ್ತ್ ಪರಿಹಾರ್ ದೀಂವ್ಕ್ ಪಡ್ತಲೊ.
  • ಮ್‌ಲ್ಯಾಧಾರಿತ್ ಶಿಕ್ಷಣ್ ಅಪ್ಣಾಯ್ನಾಸ್ತಾಂ ಫಟಿಂ ಸರ್ಟಿಫಿಕೇಟ್ ಅಪ್ಣಾವ್ನ್ ವಯ್ಜಕೀಯ್ ಸೇವಾ ದಿತಾ ತರ್ ತಾಚೆ ವಿರೋದ್ ಕಾನುನ್ ಕ್ರಮ್ ಘೆವ್ಯೆತ್.

ವಯ್ಜಾಚ್ಯಾ ಕ್ರಿಮಿನಲ್ ನಿರ್ಲಕ್ಷ ವರ್ವಿಂ ಅನಾಹುತ್ ಜಾಲ್ಲ್ಯಾ ವೆಳಿಂ ಕಿತೆಂ ಕರ್ಚೆಂ:
    ಸಾದಾರ್ಣ್ ಜಾವ್ನ್ ವಯ್ಜಾಚಿ ನಿರ್ಲಕ್ಷೆವರ್ವಿಂ ಪಿಡೆಸ್ತಾಚೆಂ ಮರಣ್ ವಾ ಹೆರ್ ಅನಾಹುತ್ ಜಾಲ್ಲ್ಯಾ ವೆಳಿಂ ಅಸ್ಪತ್ರ್ ವಾ ಕ್ಲಿನಿಕ್ ಪಿಟೊ ಕರ್ಚೆಂ ಅನಿ ಹರತಾಳ್ ಕರ್ಚೆಂ ಅಮ್ಕಾಂ ಪಳೆಂವ್ಕ್ ಮೆಳ್ತಾ. ಅಸಲ್ಯಾ ಸಂದರ್ಬಾನಿಂ ಜರ್ ಪಿಡೆಸ್ತಾಕ್ ವಾ ತಾಚ್ಯಾ ಕುಟ್ಮಾಚ್ಯಾ ಸಾಂದ್ಯಾಲಾಗಿಂ ವಯ್ಜಾಚಾ ನಿರ್ಲಕ್ಷೆವರ್ವಿಂ ಅನಾಹುತ್ ಜಾಲಾಂ ಮ್ಹಳ್ಳೊ ದಾಖ್ಲೊ ಅಸಾ ತರ್ ತಾಣಿಂ ಗ್ರಾಹಕಾಂಚಾ ವೇದಿ ಸಮ್ಕೊರ್ ದಾವೊ ಘಾಲ್ಯೆತಾ. ವಯ್ಜಾಕೀಯ್ ಸೇವಾ ಗ್ರಾಹಕಾಂಚ್ಯಾ ರಕ್ಷಣ್ ಕಾಯ್ದೊ 1986 ಚ್ಯಾ ಮುಳಾಂತ್ ಯೆತಾ ದೆಕುನ್ ತಾಣಿಂ ಹ್ಯಾ ವೆದಿ ಸಮ್ಕೊರ್ ದಾವೊ ದಾಖಲ್ ಕರ್ಯೆತಾ. ಹರೇಕ್ ಪಿಡೆಸ್ತ್ ವಯ್ಜಾಲಾಗಿಂ ಘೆಲ್ಲ್ಯಾ ವೇಳಿಂ ತೊ/ತಿ ಗ್ರಾಹಕ್ ಜಾಂವ್ಕ್ ಪಾವ್ತಾ. ಸರ್ಕಾರಿ ಅಸ್ಪತ್ರೆನ್/ವಯ್ಜಾನ್ ಕೆಲ್ಲ್ಯಾ ಚೂಕಿಕ್ ಗ್ರಾಹಕಾಂಚ್ಯಾ ವೇದಿ ಸಮೊರ್ ವಚುಂಕ್ ಜಾಯ್ನಾ ಬದ್ಲಾಕ್ ಸಿವಿಲ್ ಕೋಡ್ತಿಕ್ ದಾವೊ ದಾಖಲ್ ಕರುಂಕ್ ಜಾಯ್.

ವಯ್ಜಾಚೆ ನಿರ್ಲಕ್ಷ್ಯಾ ಜಾಲ್ಲೆ ವೆಳಿಂ ಪಿಡೆಸ್ತಾನ್/ತಾಚ್ಯಾ ಕುಟ್ಮಾನ್ ಹ್ಯಾ ಪರಿಂ ಕರುಂಕ್ ಜಾಯ್-

  • ಅನಾಹುತಾಕ್ ಒಳಗ್ ಜಾಲ್ಲ್ಯಾ ವ ತಾಚ್ಯಾ ಕುಟ್ಮಾಚ್ಯಾ ಸಾಂದ್ಯಾನ್ ಲಾಗ್ಶಿಲ್ಯಾ ಪೋಲಿಸ್ ಠಾಣ್ಯಾಂತ್ ತ್ಯಾ ವಯ್ಜಾ ವಿರೋದ್ ಪ್ರಥಮ್ ಮಾಹೆತ್ ವರ್ದಿ ದಾಖಲ್ ಕರುಂಕ್ ಜಾಯ್.
  • ಜರ್ ಪೋಲಿಸ್ ಪ್ರಥಮ್ ಮಾಹೆತ್ ವರ್ದಿ ದಾಖಲ್ ಕರುಂಕ್ ನೆಗಾರ್ ಕರ್ತಾತ್ ತರ್ ಜುಡಿಶಿಯಲ್ ಮ್ಯಾಜಿಸ್ಟ್ರೇಟ್ ಕೊಡ್ತಿಂತ್ ವಕೀಲಾಂ ದ್ವಾರಿಂ ವಯಕ್ತಿಕ್ ದಾವೊ (ಪ್ರೇವೇಟ್ ಕಂಪ್ಲೇಂಟ್) ದಾಖಲ್ ಕರ್ಚೊ.

    ವಯ್ಜಾಚ್ಯಾ ನಿರ್ಲಕ್ಷೆವರ್ವಿಂ ಜಾಲ್ಲೊ ನಷ್ಟ್ ಹೆ ಪರಿ ಅಸೊಂಕ್ ಸಾದ್ಯ್ ಅಸಾ- ಪಯ್ಶಾಂಚೊ, ವಕ್ತಾಂಚೊ ಅನಿಂ ಅಸ್ಪತ್ರೆಚೊ ಖರ್ಚ್, ಕಾಮ್ ಕರ್ನ್ ಜಿಯೆಂವ್ಕ್ ಅಸಾದ್ಯ್ ಜಾಲ್ಲೊ ನಷ್ಟ್, ಮಾನಾಸಿಕ್ ವ ವಿಶ್ವಾಂಚೊ ನಷ್ಟ್, ಇತ್ಯಾದಿ. ಹಾಂಗಾಸರ್ ವಯ್ಜಕೀಯ್ ನಷ್ಟ್ ಅನಿಂ ವಯ್ಜಾಚಿ ಕ್ರಿಮಿನಲ್ ನಿರ್ಲಕ್ಷ್ ರುಜು ಕರ್ಚಿ ಜವಾಬ್ದಾರಿ ಪಿಡೆಸ್ತ್ ಅನಿಂ ತಾಚ್ಯಾ ಕುಟ್ಮಾಚಿ ಮ್ಹಳ್ಳಿ ಸಂಗತ್ ಉಡಾಸ್ ದವರ್ಚಿ. ಹರೇಕ್ ಕಾನುನ್ ಅಮ್ಕಾಂ ಹಕ್ಕ್ ದಿತಾ ಪುಣ್ ತೆಂ ಜ್ಯಾರಿ ಕರುಂಕ್ ಪ್ರಯತನ್ ಕರ್ಚೆಂ ಅಮ್ಚೆಂ ಕರ್ತವ್ಯ್ ಮ್ಹಳ್ಳೆಂ ಜಾಣಾ ಜಾವ್ಯಾಂ. ವಯ್ಜಕೀಯ್ ಕ್ಷೇತ್ರಚಾ ಕಾನುನ್ ಸಮರಾ ವಿಶ್ಯಾಂತ್ ಭಾರತಾಚ್ಯಾ ಅನಿಂ ಪಾಶ್ಚಾತ್ಯ್ ದೇಶಾಂ ಮಧೆಂ ಹೊಂದೊನ್ ಪಳೆಯ್ಲೆಂ ತರ್ ಪಾಶ್ಚಾತ್ಯ್ ದೇಶಾಚೊ ಲೋಕ್ ಅಪ್ಲಿ ವಯ್ಜಕೀಯ್ ಹಕ್ಕಾಂ ಸಮರ್ಥನ್ ಕರ್ನ್ ಜ್ಯಾರಿ ಕರ್ಚ್ಯಾಂತ್ ಅಧಿಕ್ ಮಾಪಾನ್ ಮುಕಾರ್ ಅಸಾತ್.   

Comments powered by CComment

Copyright © 2013 - www.christiankanoon.com. Powered by eCreators