Konkani

 ಮಾ. ಬಾಪ್. ಫ್ರಾನ್ಸಿಸ್ ಅಸ್ಸಿಸಿ ಅಲ್ಮೇಡಾ,
                        ಯಾಜಕ್ ಅನಿ ವಕೀಲ್ (ಮಂಗ್ಳುರ್ ದಿಯೆಸೆಜ್)

ಪ್ರಸ್ತಾವನ್:
“ಕಾಜಾರ್ ದೋನ್ ಕಾಳ್ಜಾಂಚಾ ಮೊಗಾಚೊ ತುಟೊಂಕ್ ನಜೊ ಜಾಲ್ಲೊ ಶಾಶ್ವತ್ ಬಾಂಧ್”.  “ದೆವಾನ್ ಜೊಡಿಲಾಂ ತೆಂ ಮ್ಹನಿಸ್ ಮೊಡಿನಾ ಜಾಂವ್” ಹಿಂ ಉತ್ರಾಂ ಆಯ್ಕೊನ್  “ಸುಕಾಂತ್ ತಶೆಂ ದುಕಾಂತ್, ಪಿಡೆಂತ್ ತಶೆಂ ಭಲಯ್ಕೆಂತ್ .............” ಅಸ್ಲ್ಯಾ ಉತ್ರಾನಿಂ ಸಗ್ಳ್ಯಾ ಕಾಳ್ಜಾನ್ ಅನಿಂ ಮನಾನ್ ಮೊಗಾನ್ ಸಾಂಗಾತಾ ಲಗ್ನಾ ಕರಾರಾಂತ್ ಎಕ್ವಟ್ತಾಂವ್ ಅನಿ ಅಖೇರ್ ಪರ್ಯಾಂತ್ ಜಿಯೆತಾಂವ್ ಮ್ಹಣ್ ಭಾಸ್ ದೀವ್ನ್  ಥೊಡ್ಯಾಚ್ ದಿಸಾನಿಂ ಎಕಾಮೆಕಾ ವೆಗ್ಳಾಚಾರ್ ಘೆಂವ್ಕ್ ಸಾದ್ಯ್ ಅಸಾಗೀ? ತೆಂಯ್ ಕಾರಣಾಂ ನ್ಹಯ್ ಅಸಲ್ಲ್ಯಾ ತಸಲಿಂ ಸಾದಿಂ ಅನಿ ಕ್ಶುಲ್ಲಕ್ ಕಾರಣಾಂ ದೀವ್ನ್ ಎಕಾಮೆಕಾ ಥಾವ್ನ್ ಪಯ್ಸ್ ಸರುಂಕ್ ಸುಲಭ್ ಅಸಾಗೀ?   

ಕಾಜಾರ್ ಎಕ್ ಕರಾರ್ ಅನಿ ಅಮ್ಕಾಂ ಕ್ರೀಸ್ತಾವಾಂಕ್ ಹೆಂ ಎಕ್ ಕರಾರ್ ಮಾತ್ರ್ ನ್ಹಯ್ ಬದ್ಲಾಕ್ ಪವಿತ್ರ್ ಸಭೆನ್ ಅಮ್ಕಾಂ ದಿಲ್ಲೊ ಎಕ್ ಪವಿತ್ರ್ ಸಾಕ್ರಾಮೆಂತ್. ದೆವಾನ್ ಮ್ಹನ್ಶಾಕ್ ರಚ್ತಾನಾ ದಾದ್ಲೊ ಅನಿ ಬಾಯ್ಲ್ ಕರ್ನ್ ರಚ್ಲಿಂ (ಉತ್ಪತ್ತಿ 1: 27). ಪವಿತ್ರ್ ಸಭಾ ಭಾವಾಡ್ತಾಂಚಾ ಸತಾಂತ್ ಕಾಜಾರ್ ಎಕ್ ಸಾಕ್ರಾಮೆಂತ್ ಮ್ಹಳ್ಳೆಂ ಅಮ್ಕಾಂ ಶಿಕಯ್ತಾ. ಹ್ಯಾ ಸಾಕ್ರಾಮೆಂತಾವಿಶಿ ಉಲ್ಲೇಕ್ ಕರ್ನ್ ಜೆಜು ಮ್ಹಣ್ತಾ “ಹ್ಯಾ ಶಿವಾಯಿ ಅಶೆಂಯ್ ಸಾಂಗಲ್ಲೆಂ ಅಸಾ, ‘ಕೊಣ್ ತರ್‌ಯಿ ಅಪ್ಲೇ ಬಾಯ್ಲೆಕ್ ಸೊಡ್ತಾ, ತಾಣೆಂ ತಿಕಾ ವೆಗ್ಳಾಚಾರ್ ಪತ್ರ್ ಬರೊವ್ನ್ ದೀಜಯ್. ಪುಣ್ ಹಾಂವ್ ತುಮ್ಕಾಂ ಸಾಂಗ್ತಾ: ವ್ಯಭಿಚಾರಾ ಶಿವಾಯ್ ದುಸ್ರ್ಯಾ ಖಂಯ್ಚಾಯಿ ಕಾರಣಾನ್ ಅಪ್ಲೇ ಬಾಯ್ಲೆಕ್ ಸೊಡ್ತಾ ತೊ ಹರೇಕ್ಲೊ ತಿ ಪ್ರದ್ವಾರಿಣ್ ಜಾಂವ್ಕ್ ಕಾರಣ್ ಜಾತಾ;............” (ಮಾತೆವ್ 5:31-32) ಜೆಜು ಅನ್ಯೇಕ್ ಕಡೆಂ ಅಶೆಂ ಮ್ಹಣ್ತಾ, “ವ್ಹಯ್, ತುಮಿ ತುಮ್ಚೇಚ್ ಖುಶೆಚೆ ದೆಕುನ್ ಮೊಯ್ಜೆನ್ ತುಮ್ಚ್ಯಾ ಬಾಯ್ಲಾಂಕ್ ಸೊಡುಂಕ್ ತುಮ್ಕಾಂ ರಜಾ ದಿಲ್ಲಿ. ಪುಣ್ ಅರ್ಂಭಾ ಥಾವ್ನ್ ಅಶೆಂ ನಾತಲ್ಲೆಂ. ಹಾಂವ್ ತುಮ್ಕಾ ಸಾಂಗ್ತಾಂ: ಜೊ ಕೊಣ್ ವ್ಯಭಿಚಾರಾಚ್ಯಾ ಎಕಚ್ಚ್ ಕಾರಣಾ ಶಿವಾಯ್ ಅಪ್ಲೇ ಬಾಯ್ಲೆಕ್ ಸೊಡ್ತಾ ಅನಿ ದುಸ್ರೇಕಡೆ ಲಗ್ನ್ ಜಾತಾ, ತೊ ಪ್ರದ್ವಾರ್ ಅಧಾರ್ತಾ.” (ಮಾತೆವ್ 19:8-9). ಶಿಸಾನಿಂ ವಿಚಾರಲ್ಯಾ ಸವಾಲಾಕ್ ‘ದಾದ್ಲ್ಯಾ ಬಾಯ್ಲೇ ಮದ್ಲಿ ಗಜಾಲ್ ಅಶಿಂ ಜಾಲ್ಯಾರ್, ಕಾಜಾರ್ ಜಾಯ್ನಾತಲ್ಲೆಂಚ್ ಬರೆಂ’ ಪುಣ್ ಕಾಜಾರ್ ಎಕ್ ಅಪವ್ಣೆಂ ಮ್ಹಳ್ಳ್ಯಾವಿಶಿಂ ಜೆಜು ಜಾಪ್ ದೀವ್ನ್ ಮ್ಹಣಾಲೊ “ಹೆಂ ಉತಾರ್ ಸಕ್ಕಡ್‌ಯಿ ಮಾನುನ್ ಘೆಶೆನಾಂತ್; ಜಾಂಕಾ ತೆಂ ದೆಣೆಂ ಮೆಳ್ಳಾಂ, ತೆ ಮಾತ್ರ್ ತೆಂ ಘೆತಿತ್. ಅಸಾತ್ ಥೊಡೆ ಹಿಜ್ಡೆ, ಜಲ್ಮಾ ಥಾವ್ನ್‌ಚ್ ಅಶೆ; ಅನಿ ಥೊಡ್ಯಾಂಕ್ ಮನ್ಶ್ಯಾನಿಂ ಹಿಜ್ಡೆ ಕೆಲ್ಯಾತ್; ಅನಿ ಥೊಡ್ಯಾಂನಿ ಸರ್ಗಿಂಚ್ಯಾ ರಾಜಾ ಪಾಸತ್ ಅಪ್ಣಾಂಕ್‌ಚ್ ಹಿಜ್ಡೆ ಕರ್ನ್ ಘೆತ್ಲ್ಯಾತ್.......” (ಮಾತೆವ್ 19: 10-12).   

ಅಮ್ಚೆ ಭೊಂವಾರಿ ಅಸ್ಚ್ಯಾ ಹಿಂದು ಭಾವ್ ಭಯ್ಣಿಂಕ್ ಅರಂಭಾರ್ ಲಗ್ನ್ ಎಕ್ ಸಾಕ್ರಾಮೆಂತ್, ಪುಣ್ 1955 ಇಸ್ವೆ ಥಾವ್ನ್ ಹೆಂ ಕರಾರ್ ಜಾವ್ನ್ ಮಾತ್ರ್ ಉರ್ಲೆಂ. 1955 ಇಸ್ವೆಂತ್ ಹಿಂದು ಲಗ್ನಾ ಕಾನುನ್ (The Hindu Marriage Act 1955) ಜ್ಯಾರಿಯೆಕ್ ಅಯ್ಲೆಂ ಅನಿ ಹ್ಯಾ ಕಾನುನಾಂತ್ ವಿಛ್ಛೆಧನಾಚೆಂ ಕಲಂ ಮೆಳೆಯಿಲ್ಲೆ ವರ್ವಿಂ ಸಾಕ್ರಾಮೆಂತಾಚೊ ಸ್ಪಿರಿತ್ ಹೊಗ್ಡಾಯ್ಲೊ.  

ಪವಿತ್ರ್ ಸಭಾ ಅಮ್ಕಾಂ ಲಗ್ನಾಚ್ಯಾ ಸಾಕ್ರಾಮೆಂತಾವಿಶಿಂ ಶಿಕೊಣ್ ದಿತಾ ಅನಿ ತ್ಯಾ ಪ್ರಕಾರ್, ಕಾಜಾರ್  ದಾದ್ಲ್ಯಾ ಅನಿ ಬಾಯ್ಲೆ ಮಧೆಂ ತುಟಾನಾ ತಸಲೊ ಮೊಗಚೊ ಭಾಂಧ್. ಹೊ ಬಾಂಧ್ ಮರ್ಣಾನ್ ಮಾತ್ರ್ ರದ್ದ್ ಕರುಂಕ್ ಸಾದ್ಯ್ ಅಸಾ, ಕಿತ್ಯಾಕ್ ಹೊ ದೆವಾನ್ ಭಾಂಧ್‌ಲ್ಲೊ ಬಾಂಧ್. ಲಗ್ನ್ ದೆವಾಚೆಂ ಯೋಜನ್ ಅನಿ ಹೆಂ ಯೋಜನ್ ಸಂಸಾರಾಂತ್ ಜ್ಯಾರಿಯೆಕ್ ಹಾಡುಂಕ್ ಮ್ಹನ್ಶಾನ್ ತಾಚೊ ಸಹಾಕಾರ್ ದಿಂವ್ಚೊ. ಕಾಜಾರಾಚಿ ಲಕ್ಷಣಾ- ಎಕ್ವಟ್ ತಶೆಂ ಮೊಗಾಚೊ ತುಟಾನಾ ತಸಲೊ ಬಾಂಧ್, ಭುರ್ಗ್ಯಾ ಬಾಳಾಂ ದ್ವಾರಿ ದೆವಾಚಿ ರಚ್ನಾ ಹ್ಯಾ ಸಂಸಾರಿ ಹಾಡ್ಚೊ ಸಾಕ್ರಾಮೆಂತ್ ಅನಿಂ ವಿಶ್ವಾಸ್ಪಣಾಚೆಂ ಜೀವಿತ್.  

ಕಾನುನಿ ದ್ರಶ್ಟೆಂತ್ ಕ್ರಿಸ್ತಾಂವಾನಿಂ ಇಗರ್ಜ್ ಮಾತೆಚೆ ಅನಿ ಸಿವಿಲ್ ವೆಗ್ಳಾಚಾರ್ ಅಪ್ಣಾಂವ್ಕ್ ಅಸಾ. ಅಮ್ಕಾಂ ಲಗ್ನ್ ಎಕ್ ಸಾಕ್ರಾಮೆಂತ್ ದೆಕುನ್ ಇಗರ್ಜ್ ಮಾತೆ ಥಾವ್ನ್ ,ಅನಿ ಹೊ ಎಕ್ ಕರಾರ್ ದೆಕುನ್ ಸಿವಿಲ್ ವೆಗ್ಳಾಚಾರ್ ಆಪ್ಣಾಂವ್ಚಿ ಗರ್ಜ್. ಕೇರಳಾ ಹ್ಯೆ ಕೊಡ್ತ್, 1995 ಇಸ್ವೆಂತ್ ಜೊರ್ಜ್ ಸೆಬೆಸ್ಟಿನಾ ವಿರೋದ್ ಮೊಲಿ ಜೊಸೇಫಾನ್ ಮಾಂಡಲ್ಲ್ಯಾ ದಾವ್ಯಾಂತ್, ಉಲ್ಲೇಖ್ ಕರ್ನ್ ಮ್ಹಣ್ತಾಕೀ, “ಕ್ರೀಸ್ತಾಂವ್ ಕಾಜಾರಾಂಚೆ ವೆಗ್ಳಾಚಾರ್ ‘ಕ್ರೀಸ್ತಾಂವ್ ವೆಗ್ಳಾಚಾರ್ ಕಾನುನ್ 1869’ಹಾಚ್ಯಾ ಮುಳಾಂತ್ ಡಿಕ್ರಿ ಅಪ್ಣಾಯಿಲ್ಯಾ ಶಿವಾಯ್, ಇಗರ್ಜ್ ಮಾತೆ ಥಾವ್ನ್ ಅಪ್ಣಾಯಿಲ್ಲ್ಯಾ ವೆಗ್ಳಾಚಾರಾಂತ್ ಸಂಪೂರ್ಣ್ ಜಾಯ್ನಾ” ಹಾಕಾ ಕಾರಣ್, ಕ್ರೀಸ್ತಾಂವಾಂಕ್ ಕಾಜಾರ್ ಎಕ್ ಸಾಕ್ರಾಮೆಂತ್ ಅನಿ ಸಾಂಗಾತಾಚ್ ಲ್‌ಕಿಕ್ ರೀತಿನ್ ತೆಂ ಎಕ್ ಕರಾರ್ ಜಾವ್ನಾಸಾ.  

ಲ್‌ಕಿಕ್/ಸಿವಿಲ್ ಕಾನುನಾಂ ಪ್ರಕಾರ್ ಖಂಯ್ಚಿಂಯ್ ಕ್ಶುಲ್ಲಕ್/ಸೊಂಪಿ ಕಾರಣಾ ದೀವ್ನ್ ವೆಗ್ಳಾಚಾರ್ ಅಪ್ಣಾಂವ್ಕ್ ಸಾದ್ಯ್ ಅಸಾಗೀ? ಮ್ಹಳ್ಳೆ ಸವಾಲ್ ಉದೆತಾ. ಸಾದಾರಣ್ ಜಾವ್ನ್ ಕಾಜಾರಾಂ ಮೊಡ್ನ್ ಪಡೊಂಕ್ ಸಬಾರ್ ಕಾರಣಾ ಅಸಾತ್ ತರೀ, ದಾದ್ಲ್ಯಾ ಬಾಯ್ಲಾಂ ಮಧೆಂ ರಾಜ್ ಕರ್ಚೆಂ ಸ್ವಾರ್ಥಿ ಚಿಂತಾಪ್ ಅಯ್ಚ್ಯಾ ಕಾಳಾರ್ ಸ್ವಾಭಾವಿಕ್ ಜಾಂವ್ಕ್ ಪಾವ್ಲಾ. ಲ್ಹಾನ್ ಸಂಗ್ತಿಂ ಥಾವ್ನ್ ಅರಂಭ್ ಜಾಂವ್ಚೆಂ ಝಗ್ಡೆಂ ವೆಗ್ಳಾಚಾರಾಂತ್ ಅಂತ್ ಜಾತಾ. ಥೊಡಿಂ ಸೊಂಪಿ ಕಾರಣಾಂ ಹಾಂಗಾಸರ್ ಉಲ್ಲೇಖ್ ಕರ್ಚಿಂ ತರ್,- “ಕಾಜಾರಾ ಪಯ್ಲೆಂ ಸಾಂಗಲ್ಲ್ಯಾ ತಿತ್ಲೊ ಸಾಂಭಾಳ್ ಆತಾಂ ತಾಕಾ ನಾಂ”, “ಅವಯ್ ಬಾಪಯ್ಚ್ಯಾ ಒತ್ತಾಯೆಕ್ ಕಾಜಾರ್ ಜಾಲ್ಲಿಂ ಪುಣ್ ಮ್ಹಾಕಾ ಕಾಜಾರಾ ಪಯ್ಲೆಂ ಎಕ್ ಲವ್ವರ್ ಅಸಲ್ಲೊ”,  “ಮ್ಹಜ್ಯಾ ಘರ್ಚ್ಯಾಂ ಸಾಂಗಾತಾ ಸಂಭಂಧ್ ದವರ್ಚೊ ತಾಕಾ ನಾಕಾ”, “ಮ್ಹಜ್ಯಾ ಘರ್ಚ್ಯಾಂಕ್ ತೊ ಲೆಕಿನಾ”, “ತೆಂ ಮ್ಹಜ್ಯಾಲಾಗಿಂ ಉಲಂವ್ಚ್ಯಾಕಿ ಚಡ್ ತಾಚ್ಯಾ ಅವಯ್ ಬಾಪಯ್ ಲಾಗಿಂ ಉಲಯ್ತಾ”, “ಮ್ಹಾಕಾ ಕಾಜಾರಾ ಪಯ್ಲೆಂ ಬೊರೆಂ ಕಾಮ್ ಅಸಲ್ಲೆಂ ಅನಿಂ ಮ್ಹಾಕಾ ಕಾಜಾರಾ ಉಪ್ರಾಂತಿ ಕಾಮ್ ಕರುಂಕ್ ಸೊಡ್ತಾ ಮ್ಹಣ್ ಸಾಂಗಲ್ಲೆಂ ಪುಣ್ ಅತಾಂ ಹಾಂವೆ ಕಾಮ್ ಕರ್ಚೆಂ ತಾಕಾ ಖುಷಿ ನಾಂ ದೆಕುನ್ ಮ್ಹಾಕಾ ತಾಚೆಂ ಸಾಂಗಾತಾ ರಾವೊಂಕ್ ನಾಕಾ”, ಅಸಲಿಂ ಅನಿ ಹೆರ್ ಸಾದಿಂ ಕಾರಣಾ ಸಾಂಗುನ್ ವೆಗ್ಳಾಚಾರಾ ಖಾತಿರ್ ಗರ್ಜೆ ಭಾಯ್ರ್ ನೋಟಿಸಾಂ ಧಾಡ್ನ್ ಮನಾಭೇದ್ ಉಬ್ಜೊವ್ನ್, ಕಾಜಾರಾಂ ಮೊಡ್ತಾತ್. ಥೊಡಿ ಸೊಸ್ಣಿಕಾಯ್ ಘೆವ್ನ್ ಸಾರ್ಕ್ಯಾ ಮತಿಂತ್ ಚಿಂತುನ್ ಮೇಟ್ ಕಾಡ್ಚ್ಯಾ ಬದ್ಲಾಕ್ ಘಡ್ಯೆನ್ ಸಮಸ್ಸೊ ಪರಿಹಾರ್ ಅಪ್ಣಾಂವ್ಕ್ ಚಿಂತ್ತಾತ್. ಸಬಾರ್ ಪಾವ್ಟಿಂ ಸ್ರೀಯೊ ತಾಂಕಾ ಕಾನುನಾಂತ್ ಅಸ್ಚೇ ಅವ್ಕಾಸ್ ಬರೆ ರೀತಿನ್ ಉಪಯೋಗ್ ಕರ್ಚ್ಯಾ ಬದ್ಲಾಕ್ ವಾಂಕ್ಡ್ಯಾ ಬುದಿಕ್ ಉಪಯೋಗ್ ಕರ್ತಾತ್.   

ವಯ್ರ್ ಉಲ್ಲೇಖ್ ಕೆಲ್ಲ್ಯಾ ಕಾರಣಾಂಕ್ ಕೊಡ್ತಿಂ ಥಾವ್ನ್ ವೆಗ್ಳಾಚಾರ್ ಅಪ್ಣಾಂವ್ಕ್ ಸಾದ್ಯ್ ಅಸಾಗೀ? ಹ್ಯಾ ಸವಾಲಾಕ್ ಮುಕಾರ್ ದಿಂವ್ಚ್ಯಾಂ ದಾಖ್ಲ್ಯಾಂತ್ ಜಾಪ್ ಮೆಳ್ತಲಿ. ಎಕ್ ಸಂಗತ್ ಹಾಂಗಾಸರ್ ಉಡಾಸ್ ದವರ್ಚಿ- ಕೊಡ್ತ್ ಹರೇಕ್ ದಾವೊ, ತ್ಯಾ ದಾವ್ಯಾಚಿ ಲಕ್ಷಣಾ, ಘಡಿತಾ ಅನಿ ಪರಿಸ್ಥಿತಿ ಅವಲೋಕನ್ (ವಿಶ್ಲೇಷಣ್) ಕರ್ನ್ ಝಡ್ತಿ ಕರ್ತಾ ಶಿವಾಯ್ ಸಾರ್ವತ್ರೀಕ್ (ಜನರಲ್) ರೀತಿನ್ ಕರಿನಾಂ.  

ಕ್ರೀಸ್ತಾಂವ್ ಲಗ್ನಾಂಚ್ಯಾ ವಿಛ್ಛೇಧನಾಕ್ ಕಾರಣಾಂ: ‘ವಿಛ್ಛೇಧನ್ ಕಾನುನ್ 1869’ ಚ್ಯಾ ಕಲಂ 10, 10-A, ಅನಿ 19 ಂತ್ ಸವಿಸ್ತಾರ್ ರೀತಿನ್ ದಿಲ್ಯಾಂತ್.

ಕಲಂ 10 ಪ್ರಕಾರ್- ದಾವೊ ಮಾಂಡ್ಲೆಲ್ಯಾಚ್ಯಾ ವಿರೋದ್ ಪಾಡ್ತಿನ್-

ಕಾಜಾರಾ ಉಪ್ರಾಂತ್:

• ಪ್ರದ್ವಾರ್ ಆಧರ್‌ಲ್ಲ್ಯಾ ವೆಳಿಂ, ವಾ
• ಕ್ರೀಸ್ತಾಂವ್ ಧರ್ಮ್ ಸೊಡ್ನ್ ಹೆರ್ ಧರ್ಮಾಕ್ ಸೆರ್ವಾಲ್ಯಾರ್, ವಾ
• ದಾವೊ ಮಾಂಡ್ಚ್ಯಾ ಫುಡೆಂ ತ್ಯಾ ದಿಸಾ ಥಾವ್ನ್ ಉಣ್ಯಾರ್ ಉಣೆಂ ದೋನ್ ವರ್ಸಾಂ ವಯ್ರ್ ಗೂಣ್ ಕರುಂಕ್ ಜಾಯ್ನಾ ತಸಲ್ಯಾ ಮಾನಾಸಿಕ್ ಪಿಡೆಂತ್ ಅಸಾ ತರ್, ವಾ
• ದಾವೊ ಮಾಂಡ್ಚ್ಯಾ ಫುಡೆಂ ತ್ಯಾ ದಿಸಾ ಥಾವ್ನ್ ಉಣ್ಯಾರ್ ಉಣೆಂ ದೋನ್ ವರ್ಸಾಂ ವಯ್ರ್ ಗೂಣ್ ಜಾಯ್ನಾ ತಸಲ್ಯಾ ಕೊಡಾಚೆ ಪಿಡೆಂತ್ ಅಸಾ ತರ್, ವಾ
• ದಾವೊ ಮಾಂಡ್ಚ್ಯಾ ಫುಡೆಂ ತ್ಯಾ ದಿಸಾ ಥಾವ್ನ್ ಉಣ್ಯಾರ್ ಉಣೆಂ ದೋನ್ ವರ್ಸಾಂ ವಯ್ರ್ ಹೆರಾಂಕ್ ಬದ್ಲೊಂಚ್ಯಾ ತಸಲೆ ಲ್ಯೆಂಗಿಕ್ ಪಿಡೆಂತ್ ಅಸಾ ತರ್, ವಾ
• ಎಕ್ ವ್ಯಕ್ತಿ ಜಿವಂತ್ ಅಸಾ ಮ್ಹಳ್ಳೆಂ ಕೊಣ್ ಜಾಣಾ ಅಸಾಜೆ ಅಸಲ್ಲಿಂಗೀ ತಾಣಿ ತೊ ವ್ಯಕ್ತಿ ಜಿವಂತ್ ಅಸಲ್ಲೆ ವಿಶಿಂ 7 (ಸಾತ್) ವರ್ಸಾಂಚ್ಯಾಕೀ ಚಡ್ ತೇಂಪ್ ಅಯ್ಕೊಂಕ್ ವ ಪಳೆಂವ್ಕ್ ನಾ ತರ್, ವಾ
• ಜಾಣಾ ಅಸೊನ್ ಅನಿ ಜಾಯ್ಜಾಯ್ ಮ್ಹಣ್ ಕಾಜಾರ್ ಲ್ಯೆಂಗಿಕ್ ಕರ್ನೆ ದ್ವಾರಿಂ ಸಂಪೂರ್ಣ್ ಕರುಂಕ್ ನೆಗಾರ್ ಕೆಲ್ಲೆ ವೆಳಿಂ, ವಾ
• ದಾವೊ ಮಾಂಡ್ತೆಲ್ಯಾನ್ ತಾಚ್ಯಾ ವಿರೋದ್ ಪಾಡ್ತಿಚ್ಯಾಕ್ ಅಪ್ಣಾಂ ಸಾಂಗಾತಾ ಜಿಯೆಂವ್ಕ್ ಕೊಡ್ತಿ ಥಾವ್ನ್ ಹಾಡಲ್ಲ್ಯಾ ನೀರ್ಣಯಾಂ ಉಪ್ರಾಂತೀ ತಾಕಾ ಸ್ಪಂದನ್ ಜಾಯ್ನಾಸ್ತಾಂ ದೋನ್ ವರ್ಸಾಂ ವಯ್ರ್ ಪಯ್ಸ್ ರಾವಲ್ಲ್ಯಾ ವೆಳಿಂ, ವಾ
• ದಾವೊ ಮಾಂಡುಂಕ್ ವೆಚ್ಯಾ ವ್ಯಕ್ತಿಕ್ ದೋನ್ ವರ್ಸಾಂಚ್ಯಾಕಿ ಚಡ್ ತೇಂಪ್ ಕಾರಣ್ ನಾಸ್ತಾಂ, ಸೊಡ್ನ್ ಪಯ್ಸ್ ಗೆಲ್ಲ್ಯಾ ವೆಳಿಂ, ವಾ
• ದಾವೊ ಮಾಂಡ್ಚ್ಯಾ ವ್ಯಕ್ತಿಕ್ ಕಷ್ಟೊನ್, ತ್ಯಾ ವ್ಯಕ್ತಿ ಸಾಂಗಾತಾ ಜಿಯೆಲ್ಯಾರ್ ಅಪ್ಣಾಚ್ಯಾ ಜಿವಾಕ್ ಅಪಾಯ್ ಅಸಾ ಮ್ಹಳ್ಳೆಂ ನೀಜ್ ಭೊಗಾಪ್ ಉದೆತಾ ತರ್
• ಸ್ರೀಯಾಂಕ್ ವಯ್ರ್ ಕಾಣ್ಸಿಲ್ಯಾ ಕಾರಣಾಂ ಸಾಂಗಾತಾ, ಜರ್ ತಿಚೊ ಪತಿ ಕಾಜಾರಾ ಉಪ್ರಾಂತ್, ರೇಪ್, ಅನ್ಯೇಸರ್ಗಿಕ್ ವಾ ಮನ್ಜಾತಿ ಸಂಗಿ ಲ್ಯೆಂಗಿಕ್ ಕರ್ನಿ ಕರ್ತಾ ತರ್ ತಿಚ್ಯಾ ಪತಿ ಥಾವ್ನ್ ವಿಛ್ಛೇಧನ್ ಅಪ್ಣಾಂವ್ಕ್ ಸಾದ್ಯ್ ಅಸಾ.

ಕಲಂ 10- A ಪ್ರಕಾರ್-
ಪತಿ ಅನಿ ಪತಿಣಿನ್ ಸಾಂಗಾತಾ ಎಕಾಮೆಕಾ ಒಪ್ಪಿಗೆನ್ ವಿಛ್ಛೇಧನ್ ಅಪ್ಣಾಂವ್ಚೆಂ- ಕಾರಣಾಂ;

-    ದೋನ್ ವರ್ಸಾಂಚ್ಯಾಕೀ ಚಡ್ ತೇಂಪ್ ಎಕಾಮೆಕಾ ಥಾವ್ನ್ ಮೆಕ್ಳಿಂ ಜಾವ್ನ್ ಪಯ್ಸ್ ಜಿಯೆಂವ್ಚೆ, ಅನಿಂ
-    ಸಾಂಗಾತಾ ಜಿಯೆಂವ್ಕ್ ಸಾದ್ಯ್ ನಾ ಮ್ಹಳ್ಳಿ ಪರಿಸ್ಥಿತಿ ಉಬ್ಜಲ್ಯಾ ವೆಳಿಂ, ಅನಿಂ
-    ಸಾಂಗಾತಾ ವಿಛ್ಛೇಧನಾಕ್ ಒಪ್ಪಿಗಿ ದಿಲ್ಲ್ಯಾ ವೆಳಿಂ.

ಕಲಂ 19 ಪ್ರಕಾರ್- ಕಾಜಾರ್ ನುಲ್ಲ್ ಕರುಂಕ್-

-    ದಾವೊ ಕೊಣ್ ಮಾಂಡ್ತಾ ತಾಚ್ಯಾ ವಿರೋದ್ ಪಾಡ್ತಿಚೊ ಕಾಜಾರಾ ಅನಿ ದಾವೊ ಮಾಂಡ್ಚ್ಯಾ ವೆಳಿಂ ಲ್ಯೆಂಗಿಕ್ ರೀತಿನ್ ಅಬಲ್ ತರ್, ವಾ
-    ಪತಿ ಅನಿ ಪತಿಣ್ ಕಾಜಾರ್ ಜಾಂವ್ಕ್ ನಜೊ ಅಸಲ್ಯಾ ರಗ್ತಾ ವ ಲಗ್ನಾ ಸಂಭಂದಾಚಿ (ನ್ಯೆಸರ್ಗೀಕ್ ವಾ ಕಾನುನಿ)  ಜಾವ್ನ್ ಅಸಾತ್ ತರ್, ವಾ
-    ಖಂಯ್ಚಿಯ್ ಎಕ್ ಪಾಡ್ತ್ ಲಗ್ನಾ ವೆಳಿ ಮಾನಾಸಿಕ್ ಪಿಡೆಸ್ತ್ ತರ್, ವಾ
-    ಪ್ರಸ್ತುತ್ ಲಗ್ನಾ ಪಯ್ಲೆಂ ಹೆರ್ ಲಗ್ನ್ ಜಾವ್ನ್ ವಿಛ್ಛೆಧನ್ ಅಪ್ಣಾಯ್ನಾಸ್ತಾಂ ಅನಿ ಪಯ್ಲಿ ಪತಿಣ್/ಪತಿ ಜೀವಂತ್ ಅಸಾ ತರ್.

ಹ್ಯಾ ಕಾರಣಾಂ ಭಾಯ್ರ್ ಜರ್ ಕಾಜಾರಾ ವೆಳಿಂ ಖಂಯ್ಚಾಯ್ ಎಕಾ ಪಾಡ್ತಿನ್ ಬಳಾನ್ ವಾ ವಂಚನ್ ಕರ್ನ್ ಒಪ್ಪಿಗಿ ಅಪ್ಣಾಯ್ಲಾ ತರ್ ತೆಂ ಕಾಜಾರ್ ನುಲ್ಲ್ ಕರುಂಕ್ ಅವ್ಕಾಸ್ ಅಸಾ.

ಹಾಚ್ಯಾ ಪಯ್ಲೆಂ ಹಾಂವೆ ವಯ್ರ್ ಉಲ್ಲೇಕ್ ಕೆಲ್ಲಿಂ ಸೊಂಪಿ ಕಾರಣಾಂ, “ಕಾಜಾರಾ ಪಯ್ಲೆಂ ಸಾಂಗಲ್ಲ್ಯಾ ತಿತ್ಲೊ ಸಾಂಭಾಳ್ ಆತಾಂ ತಾಕಾ ನಾಂ” ವಾ ಹೆರ್ ಕಾರಣಾಂ ವಂಚನ್ ವ ಬಳಾನ್ ಕಾಜಾರ್ ಜಾಲ್ಲ್ಯಾ ವ್ಯಾಪ್ತಿಂತ್ ಪಡ್ತಾತ್‌ಗೀ?

ವಿವಿಧ್ ಹ್ಯೆ ಕೊಡ್ತಿನಿ ಅನಿ ಸುಪ್ರಿಮ್ ಕೊಡ್ತಿನ್ ದಿಲ್ಲ್ಯಾ ನ್ಯಾಯ್ ನಿರ್ಣಯಾಂತ್ ಖಂಯ್ಚೊ ಸಂಗ್ತಿ ವಂಚನಾಚ್ಯಾ ಗಡಿ ಭಿತರ್ ಯೆತಾತ್ ಮ್ಹಳ್ಳೆಂ ಪಳವ್ಯೆತ್-

-    ಪ್ರದಿಪ್ ಕುಮಾರ್ ಸಾಹು ವಿರೋದ್ ಶೋಭಾ ರಾನಿ (ಒಡಿಶ್ಯಾ ಹ್ಯೆ ಕೋಡ್ತ್)- ದಾದ್ಲ್ಯಾನ್ ಕಲಂ 10 ಸಕಯ್ಲ್ ಪ್ರದ್ವಾರಾಚ್ಯಾ ಕಾರಣಾಕ್ ಮಾತ್ರ್ ವಿಛ್ಛೇಧನ್ ಅಪ್ಣಾವ್ಯೆತ್

-    ಸ್ವಾಮಿ ದಾಸ್ ರಾವ್ ವಿರೋದ್ ಕಸ್ತೂರಿ ಬಾಯ್ (ಆಂದ್ರಾ ಪ್ರದೇಶ್ ಹ್ಯೆ ಕೋಡ್ತ್)- ಪ್ರದ್ವಾರ್ ಅಧಾರ್ಲ್ಯಾ ಮ್ಹಾಳ್ಳ್ಯಾ ಕಾರಣಾಕ್ ವಾದಿನ್ ದಾವೊ ಮಾಂಡ್ಲಾ ತರ್ ಪ್ರತಿವಾದಿನ್ ಸಹಪ್ರದಿವಾದಿ ಸಂಗಿ ಅಕ್ರಮ್ ಸಂಭಂಧ್ ದವರ್ಲಾ ಮ್ಹಳ್ಳೆಂ ದಾಕೊಂವ್ಕ್  ಪ್ರದಿವಾದಿನ್ ಸಹಾ ಪ್ರದಿವಾದಿ ಸಂಗಿ ಕೆಲ್ಲ್ಯಾ ಪತ್ರ್ ವ್ಯವಾಹಾರಾಚಿ ರುಜ್ವಾತ್ ಪಾವಾನಾ ಮ್ಹಳ್ಳೆಂ ಸಾಂಗ್ಲಾ.

-    ಪೀಟರ್ ಮಾಶಿ ವಿರೋಧ್ ಆಂಜೆಲಿನಾ ಮಾಶಿ (ಡೆಲ್ಲಿ ಹ್ಯೆ ಕೋಡ್ತ್)- ಪತಿಣ್ ಸಭಾರ್ ಮ್ಹಹಿನೆ ಅಪರಿಚಿತ ಸಂಗಿ ಎಕಾ ಕುಡಾಂತ್ ರಾವ್ಲಾ ತರ್ ತೆ ಸ್ರೀಯೆನ್ ಪ್ರದ್ವಾರ್ ಅಧಾರ್ಲ್ಯಾ ಮ್ಹಣ್ ಸಾಂಗ್ಯೆತ್.

-    ಪ್ಲೋರಿ ಪಿರೇರಾ ವಿರೋದ್ ಭೆನ್ನಿ ಗೊನ್ಸಾಲ್ವಿಸ್ (ಮುಂಬಯ್ ಹ್ಯೆ ಕೋಡ್ತ್)- ಪತಿಣ್ ತಿಸ್ರ್ಯಾ ವ್ಯೆಕ್ತಿ ದ್ವಾರಿ ಗರ್ಬೇಸ್ತ್ ಜಾಲ್ಯಾ ಮ್ಹಳ್ಳಿ ರುಜ್ವಾತ್ ಅಸಾ ತರ್ ತೆ ಸ್ರೀಯೆನ್ ಪ್ರದ್ವಾರ್ ಅಧಾರ್ಲಾ ಮ್ಹಣ್ ಸಾಂಗ್ಯೆತ್.

-    “ಮಿ. ಎಕ್ಸ್” ವಿರೋಧ್ ಝಡ್ ಅಸ್ಪತ್ರೆಚ್ಯಾ ದಾವ್ಯಾಂತ್ ಸುಪ್ರೀಮ್ ಕೋಡ್ತ್ ಸಾಂಗ್ತಾಕೀ, ಲಗ್ನ್ ಜಾಂವ್ಚೆಂ ಹಕ್ಕ್ ಸಂಪೂರ‍್ಣ್ ನ್ಹಯ್. ಜರ್ ಎಕ್ ವ್ಯೆಕ್ತಿ ಎಯ್ಡ್ಸ್ ವಾ ಹೆರ್ ಖಂಯ್ಚ್ಯಾಯ್ ಮಾರೆಕಾರ್ ಪಿಡೆ ವರ್ವಿಂ ಕಷ್ಟತಾ ತರ್ ತಾಚಿ/ತಿಚಿ ಪಿಡಾ ಗೂಣ್ ಜಾಲ್ಲೆ ಖರಿತ್ ತಾಣೆ/ತಿಣೆ ಲಗ್ನ್ ಜಾಂವ್ಕ್ ಜಾಯ್ನಾ.

-    ಜಾಕೊಬ್ ಮ್ಯಾಥ್ಯು ವಿರೋಧ್ ಮಯಾ ಫಿಲಿಪ್ (ಕೇರಳಾ ಹ್ಯೆ ಕೋಡ್ತ್)- ಕೋಡ್ತಿ ಥಾವ್ನ್ ವಿಛ್ಛೇಧನ್ ಅಪ್ಣಾಯ್ಲಾ ಪುಣ್ ವಯ್ಲ್ಯಾ ಕೋಡ್ತಿಕ್ ಅಪೀಲ್ ಅಸ್ತಾನಾ ಪತಿ/ಪತಿಣ್ ದುಸ್ರ್ಯಾ ವ್ಯೆಕ್ತಿ ಸಂಗಿಂ ಅನ್ಯೇಕಾ ಲಗ್ನಾಂತ್ ಎಕ್ವಟ್ತಾತರ್ ತೊ/ತಿ ಪ್ರದ್ವಾರ್ ಅದಾರ್ತಾ.

-    ಪ್ರವಿಣ್ ಮೆಹ್ತಾ ವಿರೋಧ್ ಇಂದ್ರಜಿತ್ ಮೆಹ್ತಾ (ಸುಪ್ರಿಮ್ ಕೋಡ್ತ್)- ಜರ್ ಪತಿಣ್ ತಿಚ್ಯಾ ಪಿಡೆಚೆಂ ಡಯಗ್ನೊಸ್ ಕರುಂಕ್ ನಿರಾಕರ್ಸಿತಾ ಅನಿ ವಕ್ತಾಕ್ ವಸುಂಕ್ ಅಯ್ಕಾನಾ, ವಾ ತಿಚಿ ಪಿಡಾ ಕಸಲಿ ಮ್ಹಳ್ಳೆಂ ಗುಪಿತ್ ದವರ್ತಾ, ಘೊವಾ ಸಂಗಿ ಕಾಜಾರಿ ಜಿವಿತ್ ಜಿಯೆಂವ್ಕ್ ಸಹಕಾರ್ ದೀನಾ ಅನಿ ಪೋಲಿಸಾಂಕ್ ಫಟಿಂ ದುರಾಂ ದಿತಾ- ಅಸಲಿಂ ಘಡಿತಾಂ ಘೊವಾಕ್ ನಿರಾಶಾ, ಅನಿ ಮಾನಾಸಿಕ್ ಸಂಕಷ್ಟಾಕ್ ಒಳಗ್ ಕರ್ತಾ. ಹ್ಯಾ ಸಂಧರ್ಬಿ ಘೊವಾನ್ ವಿಛ್ಛೇಧನ್ ಅಪ್ಣಾಂವ್ಕ್ ಸಾದ್ಯ್ ಅಸಾ.

-    ಲಕ್ಷ್ಮಿ ಎಸ್ ವಿರೋದ್ ಎಸ್. ಕೆ. ಧಾರ್ (ಸುಪ್ರಿಮ್ ಕೋಡ್ತ್)- ಪತಿ ಅನಿ ಪತಿಣ್ ಕಾಜಾರ್ ಜಾಂವ್ಕ್ ನಜೊ ಅಸಲ್ಯಾ ರಗ್ತಾ ವ ಲಗ್ನಾ ಸಂಭಂದಾಚಿ (ನ್ಯೆಸರ್ಗೀಕ್ ವಾ ಕಾನುನಿ)  ಜಾವ್ ಆಸೊನ್ ಸಂಭಂಧ್ ಜಾಲ್ಲ್ಯಾ ವ್ಹಡಿಲಾಂ ಥಾವ್ನ್ ಡಿಸ್ಪೆನ್ಶೇಷನ್ ಕಾಣ್ಗೆವ್ನ್ ಲಗ್ನಾಂತ್ ಎಕ್ವಟ್ತಾತ್ ತರ್, ತಾಣಿ ಉಪ್ರಾಂತ್ ಹೆಂ ಕಾರಣ್ ದೀವ್ನ್ ಕೊಡ್ತಿ ಥಾವ್ನ್ ವೆಗ್ಳಾಚಾರ್ ಘೆಂವ್ಕ್ ಸಾದ್ಯ್ ನಾಂ.

ದುಸ್ರ್ಯಾ ಲಗ್ನಾ ಪಯ್ಲೆಂ ಭುರ್ಗಿಂ ಜಾಯ್ನಾಶೆಂ ಅಡಂವ್ಕ್ ಕೆಲ್ಲೆಂ ಒಪರೇಷನ್ ಪತಿಣೆಂ ಥಾವ್ನ್ ಲಿಪವ್ನ್ ದವರಲ್ಲೆಂ ವಂಚನ್:

-    ಪಿ. ಜೆ. ಮೂರ್ ವಿರೋಧ್ ವಾಲ್ಸಾ (ಕೇರಳಾ ಹ್ಯೆ ಕೋಡ್ತ್)- ಲಗ್ನಾಚೊ ಎಕ್ ಪ್ರಮುಖ್ ಉದ್ದೇಶ್ ಭುರ್ಗ್ಯಾಂಕ್ ಜಲ್ಮಾ ಹಾಡ್ಚಿಂ. ಸ್ರೀಯೋ ಅವಯ್ಪಣಾಚೆಂ ಭಾಗ್ ಅಪ್ಣಾಂವ್ಕ್ ಅಶೆತಾತ್. ಜರ್ ಪತಿ ಅಪ್ಲ್ಯಾ ಪತಿಣೆಕ್ ಲಾಬ್ಚೆಂ ಅವಯ್ಪಣಾಚೆಂ ಭಾಗ್ ದೀಂವ್ಚೊ ಅಪ್ಲೊ ವಿಸ್ವೊ ಲಗ್ನಾ ಪಯ್ಲೆಂ ಒಪರೇಷನಾ (ವ್ಯಾಸಕ್ಟೊಮಿ) ದ್ವಾರಿ ಹೊಗ್ಡಾಯ್ತಾ ಅನಿ ಹಿ ಸಂಗತ್ ಅಪ್ಲ್ಯಾ ಪತಿಣೆ ಥಾವ್ನ್ ಲಗ್ನಾ ಸಂದರ್ಭಿಂ ಲಿಪವ್ನ್ ದವರ್ತಾ ತರ್ ತೆಂ ವಂಚನಾಚ್ಯಾ ವ್ಯಾಪ್ತಿಕ್ ಯೆತಾ.

ಲಗ್ನಾ ಪಯ್ಲೆಂ ದುಸ್ರ್ಯಾ ದಾದ್ಲ್ಯಾ ಥಾವ್ನ್ ಗರ್ಭೆಸ್ತ್:

-    ಜೊಮನ್ ಎಮ್. ಜೆ.(ಎಮ್. ಸಿ. ಜೊನ್) ವಿರೋಧ್ ಮರ್ಸಿ ಜೊನ್ (ಕೇರಳಾ ಹ್ಯೆ ಕೊಡ್ತ್)- ಲಗ್ನಾಚ್ಯಾ ದೀಸಾ ಪತಿಣ್ ದುಸ್ರ್ಯಾ ದಾದ್ಲ್ಯಾ ಥಾವ್ನ್ ಗರ್ಭೆಸ್ತ್ ಜಾವ್ನಾಸೊನ್, ಅಪ್ಲ್ಯಾ ಪತಿ ಥಾವ್ನ್ ಹಿ ಸಂಗತ್ ಲಿಪವ್ನ್ ದವರ್ತಾ ತರ್ ಪತಿನ್ ತ್ಯಾ ಅಪ್ಲ್ಯಾ ಪತಿಣೆ ಥಾವ್ನ್ ವಂಚನಾಚ್ಯಾ ಕಾರಣಾಕ್ ವೀಛ್ಛೇಧನ್ ಅಪ್ಣಾವ್ಯೆತ್.

ಲಗ್ನ್ ಅನಿ ಕರಾರ್:

ಲಗ್ನ್ ಎಕ್ ಕರಾರ್. ಕರಾರಾ ವೆಳಿಂ ಎಕಾ ಪಾಡ್ತಿನ್ ವಂಚನ್ ಕೆಲೆಂ ತರ್ ತೆಂ ಕರಾರ್ ಕಾರ್ಯಾಗತ್ ಕರ್ನಾಸ್ತಾ ರದ್ದ್  ಕರುಂಕ್ ಅನ್ಯೇಕ್ ಪಾಡ್ತಿಕ್ ಕಾನುನಾಂತ್ ಅವ್ಕಾಸ್ ಅಸಾ. ಸಾದೆಂ ಕರಾರ್ ಅನಿ ಲಗ್ನಾ ಕರಾರ್ ಎಕಾಚ್ ಮಾಪಾನ್ ದೆಕೊಂಕ್ ಜಾಯ್ನಾ ಮ್ಹಣ್ತಾ ಕೋಡ್ತ್.

-     ಪಿ. ಜೆ. ಮೂರ್ ವಿರೋಧ್ ವಾಲ್ಸಾ (ಕೇರಳಾ ಹ್ಯೆ ಕೋಡ್ತ್)- ಕರಾರ್ ಕರ್ತಾನಾ (ಕಲಂ 17, ಕರಾರ್ ಕಾನುನ್ 1872) ಜ್ಯಾ ಕೊಣೆಂ ಉಗ್ತ್ಯಾನ್ ಉಲಯ್ಜೆ ಅಸಲ್ಲೆಂ ತೊ ವ್ಯಕ್ತಿ ಉಲಯ್ನಾ ತರ್ ತೆಂ ಉಲಯ್ನಾಸ್ತಾಂ ರಾಂವ್ಚೆಚ್ ವಂಚನಾಚ್ಯಾ ವ್ಯಾಪ್ತಿಕ್ ಯೆತಾ. ಪುಣ್ ಲಗ್ನಾಚ್ಯಾ ಸಂಗ್ತಿಂಕ್ ಯೆತಾನಾ ಹೆಂ ತಿತ್ಲ್ಯಾ ಮಾಪಾನ್ ಲಾಗು ಜಾಯ್ನಾ. ಲಗ್ನಾ ಕರಾರಾ ವೆಳಿಂ  ಸಂಭಂಧ್ ರುತಾ ಕರ್ತಾನಾ ಪಾಡ್ತಿಂ ಮಧೆಂ ಜಾಂವ್ಚ್ಯಾ ಉದ್ವೇಗಾ ಅನಿ ಹೆರ್ ಕಾರಣಾಂಕ್ ಲಾಗುನ್ ಎಕಾ ಮೆಕಾ ಒಪ್ಪಿಗಿ ಅಪ್ಣಾಂವ್ಚೆ ಪಾಸತ್ ಥೊಡೆ ಸಂಗ್ತಿಂ ಲಿಪವ್ನ್ ದವರ್ಚಿ ಸಾದ್ಯತಾ ಅಸಾ. ದೆಕುನ್ ಸಾದ್ಯಾ ಹೆರ್ ಕರಾರಾ ಮದೆಂ ಅನಿ ಲಗ್ನಾ ಕರಾರಾ ಮಧೆಂ ಥೊಡಿ ಬದ್ಲಾವಣ್ ಅಯ್ಲ್ಯಾ. ಹಾಂಗಾಸರ್ ವಂಚನಾಚ್ಯಾ ವ್ಯಾಪ್ತಿಕ್ ಯೆಂವ್ಚಿ ಸಂಗತ್ ಜಾವ್ನಾಸಾ- ಜರ್ ತಿ ಸಂಗತ್ ಗುಪಿತ್ ದವರ್ಲಿ ತರ್ ಕಾಜಾರಿ ಕರಾರಾಚೆ ಮೂಳ್ ಅಂಶಾಂಕ್ ವಿರೋದ್ ವೆತಾ ತರ್ ಜಾಲ್ಯಾರ್ ಮಾತ್ರ್.

-    ಹರ್ಭಜನ್ ಸಿಂಗ್ ವಿರೋಧ್ ಬ್ರಿಜ್ಬಾಲಪ್ ಕ್‌ರ್ (ಪಂಜಾಬ್ ಹ್ಯೆ ಕೊಡ್ತ್ )ಅನಿ ರಾನಿಬಾಲಾ ದೆಬಾಂತ್ ವಿರೋಧ್ ಅರ್. ಕೆ. ದೆಬಾಂತ್ (ಕೊಲ್ಕೊತ್ತಾ ಹ್ಯೆ ಕೊಡ್ತ್)-  ಹ್ಯಾ ದಾವ್ಯಾನಿಂ ಚಲಿಯೆನ್ ವಾ ತಿಚ್ಯಾ ಸಯ್ರ್ಯಾನಿಂ ತಿಚ್ಯಾ ಪಾಟ್ಲ್ಯಾ ಜಿಣ್ಯೆಂತ್ ಲಗ್ನಾ ಪಯ್ಲೆಂ ಜಾಲ್ಯಾ ಘಡಿತಾಂ ವಿಶಿಂ ಗುಪಿತ್ ದವರಲ್ಯೊ ಸಂಗ್ತಿ ವಂಚನಾಚ್ಯಾ ವ್ಯಾಪ್ತಿಕ್ ಯೆನಾಂತ್ ಮ್ಹಳ್ಳೆಂ.

-    ತಶೆಂಚ್ ರಘುನಾಥ್ ಗೊಪಾಲ್ ವಿರೋಧ್ ವಿಜಯಾಚ್ಯಾ ದಾವ್ಯಾಂತ್ (ಭಾಂಬೆ ಹ್ಯೆ ಕೊಡ್ತ್)- ಚಲ್ಯೆಕ್ ಲಗ್ನಾ ಪುರ್ವಿ ಅಸಲ್ಯಾ ಮೂರ್ಛ್ ಪಿಡೆಂ ವಿಶಿಂ ಗುಪಿತ್ ದವರಲ್ಲಿ ಸಂಗತ್ ವಂಚನಾ ವ್ಯಾಪ್ತಿಕ್ ಯೆನಾ ಮ್ಹಳ್ಳೆಂ ಕೊಡ್ತಿನ್ ಸಾಂಗ್ಲಾ

-    ಅನು ತೋಮಸ್ ವಿರೋಧ್ ಮ್ಯಾಥ್ಯೂ ತೋಮಸ್ (ಕೇರಳ ಹೈ ಕೋಡ್ತ್) - ಪತಿಣಿನ್ ಪ್ರಸ್ತುತ್ ಲಗ್ನಾ ಪಯಿಲ್ಲೆಂ ಅನ್ಯೇಕ ದಾದ್ಲ್ಯಾ ಸಂಗಿಂ ಲಗ್ನಾಂತ್ ಎಕ್ವೊಟೊನ್ ಪ್ರಸ್ತುತ್ ಲಗ್ನಾಂತ್ ಎಕ್ವೊಟ್ಚಾ ಸಂಧರ್ಬಿ ಆಪ್ಲ್ಯಾ ದಾದ್ಲ್ಯಾ ಲಾಗಿಂ ಹ್ಯಾ ಲಗ್ನಾ ಪಯಿಲ್ಲೆ ಆನ್ಯೇಕ ಲಗ್ನಾಂತ್ ಎಕ್ವೊಟ್ಲೆಲಿ ಗಜಾಲ್ ಗುಪಿತ್ ದವರ‍್ತಾ ತರ್ ಪ್ರಸ್ತುತ್ ಲಗ್ನಾಂ ಥಾವ್ನ್ ದಾದ್ಲ್ಯಾನ್, ಸ್ತ್ರೀಯೆನ್  ವಂಚನ್ ಕೆಲಾ ಮ್ಹಳ್ಳೆಂ ದಾಕವ್ನ್ ಕೋಡ್ತಿ ಥಾವ್ನ್ ವಿಚ್ಛೇದನ್ ಆಪ್ಣಾವ್ಯೆತ್.

-    ಬೆಂಜಮಿನ್ ದೊಮಿಂಗ್ ಕಾರ್ಡೊಜಾ ವಿರೋಧ್ ಗ್ಲೇಡಿಸ್ ಬೆಂಜಮಿನ್ ಕಾರ್ಡೊಜಾ (ಬೊಂಬೈ ಹೈ ಕೋಡ್ತ್) – ಜರ್ ಪತಿಣೆನ್ ಲಗ್ನಾಂ ಪಯಿಲ್ಲೆ ಪೆಲೊಫಿಯಾನ್ ಟ್ಯೂಬಾಚೆ ಒಪರೇಶನ್ ಕರ‍್ನ್ (ಹೆಂ ಒಪರೇಶನ್ ಜಾಲ್ಯಾರ್ ಭುರ್ಗಿಂ ಜಾಂವ್ಕ್ ಆಸಾದ್ಯ್) ಹಿಂ ಸಂಗತ್ ಲಗ್ನಾಂ ಸಂಧರ್ಬಿ ಆಪ್ಲ್ಯಾ ಪತಿ ಥಾವ್ನ್ ಲಿಪೊನ್ ದವರ್‌ಲ್ಲಿ ತರ್ ಪತಿನ್, ಆಪ್ಲ್ಯಾ ಪತಿಣೆನ್ ಆಪ್ಣಾಕ್ ವಂಚನ್ ಕೆಲಾ ಮಳ್ಳೆಂ ಕಾರಣ್ ದೀಂವ್ನ್ ಕೋಡ್ತಿ ಥಾವ್ನ್ ವಿಚ್ಛೇದನ್ ಆಪ್ಣಾಂವ್ಕ್ ಸಾದ್ಯ ಆಸಾ.

-    ಲೀಲಮ್ಮ ವಿರೋದ್ ದಿಲಿಪ್ ಕುಮಾರ್ (ಕೇರಳ ಹೈ ಕೊಡ್ತ್) - ಪತಿ ಲಗ್ನಾಂ ಸಂದರ್ಬಿಂ ಮುಸ್ಲಿಮ್ ಧರ್ಮಚೊ ಜಾವ್ನಾಸೊನ್ ಲಗ್ನಾಂವೆಳಾರ್ ಅಪುಣ್ ಕ್ರಿಸ್ತಾಂವ್ ಧರ್ಮಾಕ್ ಸೆರ್ವಾಲ್ಲೊ ಮುಣೊನು ಪಟಿ ಮಾರ‍್ನ್ ಆಪ್ಲ್ಯಾ ಪತಿಣೆ ಥಾವ್ನ್ ತ್ಯಾ ಲಗ್ನಾಕ್ ಒಪ್ಪಿಗೆ ಆಪ್ಣಾಯ್ತಾ ತರ್ ಪತಿಣೆನ್ ಲಗ್ನಾಉಪ್ರಾಂತ್ ಪತಿನ್ ಆಪ್ಣಾಕ್ ವಂಚನ್ ಕೆಲಾ ಮ್ಹಳ್ಳೆ ಕಾರಣ್ ದೀಂವ್ಕ್ ಅಪ್ಲ್ಯಾ ಪತಿ ಥಾವ್ನ್ ವಿಚ್ಛೇದನ್ ಆಪ್ಣಾವ್ಯೆತ್.

-    ಶ್ರೀ ಮತಿ ಬೆಸ್ಟ್ ಮೊರ‍್ನಿಂಗ್ ವಿರೋದ್ ನಿರ್ಮಲೆಂದು ಡೆಬ್ (ಗುವಾಹಟಿ ಹೈ ಕೋಡ್ತ್) - ಸಾದರ್ಣ್ ಜಾವ್ನ್ ಲಗ್ನಾಂ ಪಯಿಲ್ಲೆ ಸ್ತ್ರೀಯೆಚೆ ಅನಿಸ್ಕಳ್‌ಪೊಣ್ ದಾದ್ಲ್ಯಾನ್ ಕಾಜಾರ್ ನುಲ್ ಕರುಂಕ್ ಸಂಪೂರ್ಣ್ ಕಾರಣ್ ನಯಿಂ. ಹ್ಯಾ ಕಾರಣಾ ಸಾಂಗಾತಾ ಹೆರ್ ಕಾರಣಾ ಆಸಾತ್ ತರ್ ಸಾದ್ಯಾ ಆಸಾ. ಪತಿಣೆನ್ ಲಗ್ನಾ ಸಂಧರ್ಬಿ ಆಪ್ಲ್ಯಾ ಪತಿ ಥಾವ್ನ್ ತಿಚ್ಯಾ ಅವ್ಗುಣ್, ಸವಯೊಂ ಅಸೊಸ್ಣಿಕಾಯಿ, ಪ್ರಖ್ಯಾತ್ಪೊಣಾಕ್ (reputation), ಭಲಾಯ್ಕೆ ಆನಿ ಅಸಲ್ಯೊ ಸಂಗ್ತಿ ಗುಪಿತ್ ದವರ‍್ಲ್ಯೊ ತರ್ ಪತಿನ್ ಆಪ್ಲ್ಯಾ ಪತಿಣೆನ್ ವಂಚನ್ ಕೆಲಾ ಮಳ್ಳೆ ಸಾಂಗೊಂಕ್ ಸಾದ್ಯ ನಾ.

-    ಡೇವಿಡ್ ವಿರೋದ್ ಕಲ್ಪನ (ಬೊಂಬೈ ಹೈ ಕೋಡ್ತ್) – ಕಾಜಾರಾ ಪಯ್ಲೆಂ ಅನಿಸ್ಕಳ್‌ಪೊಣಾ ವಿಶಿಂ ಉಲ್ಲೇಖ್ ಕರ್ನ್ ಕೋಡ್ತ್ ಸಾಂಗ್ತಕೀ ಲಗ್ನಾಚಾ ಕರಾರ ವೆಳಾರ್ ಪಟ್ ಸಾಕ್ಷ್ ಲಗ್ನಾಚಾ ಮೌಲ್ಯಕ್ ಬಾದಕ್ ಜಾಯ್ನಾ.

ಅಖೇರಿಕ್ ಸಾಮಾನ್ಯ್ ಜಾವ್ನ್ ಮ್ಹಜ್ಯಾ ಪತಿನ್/ಪತಿಣೆನ್ ಮ್ಹಾಕಾ ಮೋಸ್ ಕೆಲಾ ವಾ ವಂಚನ್ ಕೆಲಾ ದೆಕುನ್ ಮ್ಹಾಕಾ ಡ್ಯೆವೋರ್ಸ್ ಜಾಯ್ ಮ್ಹಣ್ತಲ್ಯಾಂನಿಂ ಹಿ ಸಮ್ಜೊಣಿ ಮತಿಂತ್ ದವರ್ಚಿ ಬರಿ. ಕ್ರೀಸ್ತಾಂವ್ ಧರ್ಮಾ ಪರ್ಮಾಣೆಂ ಲಗ್ನ್ ಜಾಂವ್ಚೆಂ  ಮ್ಹನ್ಶ್ಯಾಚೆಂ ಹಕ್ಕ್ ಪುಣ್ ಡ್ಯೆವೋರ್ಸ್ ಅಫ್ಣಾಂವ್ಚೆಂ ಕಾಜಾರಿ ಮ್ಹನ್ಶ್ಯಾಂಚೆ ಹಕ್ಕ್ ನ್ಹಯ್ ಮ್ಹಳ್ಳೆಂ ಜಾಣಾ ಜಾಂವ್ಚೆಂ ಬರೆಂ. ಸಾಂಗಾತಾಚ್ಚ್ ವಯ್ರ್ ಕಾಣ್ಸಿಲ್ಲಿ ಕ್ಷುಲ್ಲಕ್/ಸೊಂಪಿ ಕಾರಣಾ ದೀವ್ನ್ ಕೋಡ್ತಿ ಥಾವ್ನ್ ವಿಛ್ಛೇಧನ್ ಅಪ್ಣಾಂವ್ಕ್ ಸಾದ್ಯ್ ನಾಂ. ಲಗ್ನ್ ಎಕ್ ಸಾಕ್ರಾಮೆಂತ್, ದೆಕುನ್ ಸಾರ್ಕೆಂ ಚಿಂತುನ್, ಪರಿಶೀಲನ್ ಕರ್ನ್ ಲಗ್ನಾಂತ್ ಎಕ್ವಟ್ಲಾರ್ ಅನಿ ಸ್ವಾರ್ಥಿ ಚಿಂತಾಪ್ ಪಯ್ಸ್ ಕೆಲ್ಯಾರ್ ಲಗ್ನಾ ಜೀವಿತ್ ಸುಫಳ್‌ಪಣಿ ಜಿಯೆಂವ್ಕ್ ಸಾದ್ಯ್ ಅಸಾ.