“ಅರೆಸ್ಟ್ ವಾ ಕಯ್ದ್”ಚೊ ಅರ್ಥ್ ಅನಿ ಅರೆಸ್ಟ್ ಜಾಲ್ಲ್ಯಾಂಚಿಂ ಹಕ್ಕಾಂ
ಮಾ. ಬಾಪ್. ಅಸ್ಸಿಸಿ ಅಲ್ಮೇಡಾ
ಯಾಜಕ್ ಅನಿ ವಕೀಲ್ (ಮಂಗ್ಳುರ್ ದಿಯೆಸೆಜ್)
1. ಅರೆಸ್ಟ್ (ಕಯ್ದ್) ಮ್ಹಳ್ಳ್ಯಾರ್ ಕಿತೆಂ?
ಭಾರತೀಯ್ ಸಂವಿಂಧಾನಾಚಾ ಅನುಛ್ಛೇದ (Article) 21 ಪ್ರಕಾರ್ ಕಾನುನಾಂತ್ ದಿಲ್ಲ್ಯಾ ನಿಯಮಾ ಭಾಯ್ರ್ ಎಕಾ ವ್ಯಕ್ತಿಚೆಂ ವ್ಯಕ್ತಿಗತ್ ಸ್ವಾತಂತ್ರ್ ಅನಿಂ ಜೀವಾಕ್ ಹಾನಿಕಾರಕ್ ಜಾಂವ್ಚೆಂ ತಸಲೆಂ ಕರುಂಕ್ ಕೊಣಾಕಿ ಅವ್ಕಾಸ್ ನಾಂ. ಕಯ್ದ್ ವಾ ಅರೇಸ್ಟ್ ಮ್ಹಳ್ಳ್ಯಾರ್ ಎಕಾ ವ್ಯಕ್ತಿಚಾ ವ್ಯಕ್ತಿಗತ್ ಸ್ವಾತಂತ್ರಾಚೆರ್ ಕಾನುನಾಚೊ ಅಧಿಕಾರ್ ಅಸಲ್ಲ್ಯಾ ವ್ಯಕ್ತಿನ್ ತಾಚೊ ಸ್ವತಂತ್ರ್ ಸಂಪೂರ್ಣ್ ರೀತಿನ್ ಅನುಭೋಗ್ ಕರುಂಕ್ ಅಡ್ಕಳ್ ಹಾಡ್ಚಿ.
2. ಕಯ್ದ್ ವಾ ಅರೇಸ್ಟ್ ಕರ್ಚೊ ಉದ್ದೇಶ್ ಕಿತೆಂ?
- ಎಕಾ ಅರೋಪಿಕ್ ತನ್ಕೆಕ್ ಕೋಡ್ತಿ ಸಮೊರ್ ಹಾಜರ್ ಕರ್ಚೆ ಪಾಸತ್,
- ಮುಖಾರ್ ಜಾಂವ್ಚೊ ಹಲ್ಲೊ ರಾವೊಂಕ್ ವಾ ಜಾಗ್ರುತ್ಕಾಯೆಚೆ ಮೇಟ್ ಜಾವ್ನ್ ಎಕಾ ವ್ಯಕ್ತಿಕ್ ವಾ ಸಭಾರಾಂಕ್ ಕ್ಯೇದ್ ಕರ್ಚೆಂ.
- ಪೋಲಿಸಾನಿಂ ಗಮನಾಕ್ ಘೆವ್ನ್ ಕಯ್ದ್ ಕರುಂಕ್ ಅವ್ಕಾಸ್ ನಾತಲ್ಲ್ಯಾ ಸಂಧರ್ಭಾನಿಂ ಎಕಾ ವ್ಯಕ್ತಿಚೆಂ ಸಾರ್ಕೆಂ ನಾಂವ್ ಅನಿಂ ವಿಳಾಸ್ ಅಪ್ಣಾಂವ್ಚಾ ದಿಶೆನ್.
- ಪೋಲಿಸ್ ಅಧಿಕಾರಿಂಚಾ ಕಾಮಾಕ್ ಅಡ್ಕಳ್ ಹಾಡ್ಚ್ಯಾ ತಸಲ್ಯಾ ವ್ಯಕ್ತಿಂಕ್.
- ಕಾನುನಾಚ್ಯಾ ಹಾತಾಂತ್ ಥಾವ್ನ್ ಧಾಂವೊನ್ ಗೆಲ್ಲ್ಯಾ ವ್ಯಕ್ತಿಂಕ್.
3. ಕಯ್ದ್ ವಾ ಅರೇಸ್ಟ್ ಕರ್ಚೊ ಅಧಿಕಾರ್ ಕೊಣಾಕ್ ಅಸಾ?
ಪೋಲಿಸ್ ಅಧಿಕಾರಿಂಕ್, ಸುಪಿರಿಯರ್ ಪೋಲಿಸ್ ಅಧಿಕಾರಿಂಕ್, ಮ್ಯಾಜಿಸ್ಟ್ರೇಟಾಕ್, ಮಿಲಿಟರಿ ಅಧಿಕಾರಿಕ್, ಖಂಯ್ಚಾಯ್ ಎಕಾ ಸಾಮಾನ್ಯ್ ವ್ಯಕ್ತಿಕ್ ವಾರಂಟ್‌ನಾಸ್ತಾಂ ಅನ್ಯಾಯ್ ಕೆಲ್ಲ್ಯಾ ವ್ಯಕ್ತಿಕ್ ವಾ ಅರೋಪಿಕ್ ಕಯ್ದ್ ಕರ್ಯೆತ್.
4. ಅರೆಸ್ಟ್ (ಕಯ್ದ್) ಜಾಲ್ಲ್ಯಾ ವ್ಯಕ್ತಿಚಿಂ ಹಕ್ಕಾ ಕಸಲಿಂ?
- ಅರೆಸ್ಟ್ ಕರುಂಕ್ ಕಾರಣ್ ಕಿತೆಂ ಮ್ಹಳ್ಳೆ ಕಳಯ್ಜಾಯ್.
- ಮೆಜಿಸ್ಟ್ರೆಟಾ ಥಾವ್ನ್ ಅರೆಸ್ಟ್ ಕರುಂಕ್ ಅದೇಶ್ ಪತ್ರ್ ಹಾಡ್ಲಾಂ ತರ್ ತೆಂ ಪಳೆಂವ್ಚೆ ಹಕ್ಕ್ ಅಸಾ.
- ವಕೀಲಾಕ್ ಸಂಪರ್ಕ್ ಕರ್ಚೆಂ ಹಕ್ಕ್ ಅಸಾ.
- ದಾಕ್ತೆರಾಕ್ ಮೆಳೊನ್ ಭಲಾಯ್ಕಿ ತಪಾಸಣ್ ಕರುಂಕ್ ಅವ್ಕಾಸ್ ಅಸಾ.
- ಮೆಜಿಸ್ಟೇಟಾ ಮುಕಾರ್ 24 ವರಾಂ ಭಿತರ್ ಹಾಜರ್ ಕರುಂಕ್ ಜಾಯ್ (ಪ್ರಯಾಣ್ ಕರ್ಚೊ ವೇಳ್ ಸೊಡ್ನ್)
- ಪೋಲಿಸ್ ಸ್ಟೇಶನಾಂತ್ ಜಾಮಿನ್ ಅಪ್ಣಾಂವ್ಕ್ ಸಾದ್ಯ್ ಅಸಾ ಜಾಲ್ಯಾರ್ ತೆಂ ಜಾಣಾ ಜಾಂವ್ಚೆಂ ಹಕ್ಕ್ ಅಸಾ.
- ಸ್ತ್ರೀಯಾಂನಿ ಅನಿ ಭುರ್ಗ್ಯಾನಿಂ ಉಚಿತ್ ಕಾನುನ್ ಸೆವಾ ಅಪ್ಣಾಂವ್ಚೆಂ ಹಕ್ಕ್ ಅಸಾ (ಸಂಧರ್ಬಾಂಕ್ ಸರಿ ಜಾವ್ನ್)
- - ಹಾಂಚ್ಯಾ ಸಾಂಗಾತಾ ಸ್ರ್ತೀಯಾಂಚಿ ವಿಶೇಷ್ ಹಕ್ಕಾಂ-
- ಸ್ತ್ರೀಯಾಂಕ್ ಸ್ತ್ರೀ ಪೋಲಿಸ್ ಅಧಿಕಾರಿನಿಂ ಮಾತ್ರ್ ಅರೇಸ್ಟ್ ಕರ್ಯೆತಾ.
- ಸ್ತ್ರೀಯಾಂಕ್ ಕಾಳೊಕ್ ಜಾಲ್ಲ್ಯಾ ಉಪ್ರಾಂತ್ ಥಾವ್ನ್ ಉಜ್ವಾಡ್ತಾ ಪರ‍್ಯಾಂತ್ ಪೋಲಿಸಾನಿಂ ತಾಂಕಾ ದಾದ್ಲ್ಯಾಂ ಪೋಲಿಸ್ ಸ್ಟೇಶನಾಂತ್ ದವ್ರುಂಕ್ ಅನಿಂ ತನ್ಕಿ ಕರುಂಕ್ ಅವ್ಕಾಸ್ ನಾಂ
- ಸ್ತ್ರೀಯಾಂಕ್ ಸ್ತ್ರೀ ಪೋಲಿಸಾನಿಂ ಮಾತ್ರ್ ಶೋಧನ್ ಕರುಂಕ್ ಅವ್ಕಾಸ್ ಅಸಾ.
- ಪೋಲಿಸಾನಿಂ ಎಕಾ ಸ್ತ್ರೀಯೆಕ್ ಖಂಯ್ಚ್ಯೆಯ್ ಎಕ್ ಘಡಿತ್ ತಿ ಜಿಯೆಂವ್ಚ್ಯಾ ಜಾಗ್ಯಾ ಭಾಯ್ರ್ ಘಡ್ತಾ ತರ್ ತ್ಯಾ ಘಡಿತಾಕ್ ಸಾಕ್ಶಿದಾರ್ ಜಾಂವ್ಕ್ ಒತ್ತಾಯ್ ಕರುಂಕ್ ಸಾಧ್ಯ್ ನಾಂ.
Comments powered by CComment