ಜುಲೈ 30, 2013 : ಮಧ್ಯ ಪ್ರದೇಶಾಂತ್ ಅಸ್ತಿತ್ವಾಂತ್ ಅಸ್ಚ್ಯಾ ಮತಾಂತರ್ ವಿರೋದಿ ಕಾನುನಾಕ್ ತಿದ್ದುಪಡಿ ಹಾಡ್ನ್, ಕ್ರಿಸ್ತಾಂವ್ ಅನಿ ಹೆರ್ ಧರ್ಮಾಕ್ ಮತಾಂತರ್ ಜಾಂವ್ಚ್ಯಾ ವ್ಯಕ್ತಿಚೊ ಗಳೊ ಚಿರ್ಡುಂಚಾ ಇರಾದ್ಯಾನ್ ಥಂಯ್ ಅಸ್ಚ್ಯಾ ರಾಜ್ಯ್ ಸರ್ಕಾರಾನ್ ಮೇಟ್ ದವರ್ಲಾಂ. ಮದ್ಯ ಪ್ರದೇಶ್ ರಾಜ್ಯಾಂತ್ 1968 ಇಸ್ವೆಂತ್ ಮತಾಂತರ್ ವಿರೋದಿ ಕಾನುನ್ ಜ್ಯಾರಿಯೆಕ್ ಹಾಡ್ಲೆಂ. ಹ್ಯಾ ಕಾನುನಾಕ್ ಅತಾಂ ಥೊಡಿ ಬದ್ಲಾವಣ್ ಹಾಡುಂಕ್ ಯೋಜನ್ ಘಾಲಾ. ಹ್ಯಾ ಬದ್ಲಾವಣೆ ಪ್ರಕಾರ್ ಕೋಣಾಕೀ ಜರ್ ಧರ್ಮ್ ಬದ್ಲುಂಕ್ ಖುಷಿ ಅಸಾ ತರ್ ತ್ಯಾ ವ್ಯಕ್ತಿನ್ ರಾಜ್ ನೀತಿಚಾ ವ್ಯಕ್ತಿಂಚಿ ಪರ್ವಣ್ಗಿ ಅಪ್ಣಾಂವ್ಕ್ ಜಾಯ್. ಮ್ಹಳ್ಯಾರ್ ಸರ್ಕಾರಿ ಅಧಿಕಾರಿಚಿ ಪರ್ವಣ್ಗಿ ಅಪ್ಣಾವ್ನ್ ಉಪ್ರಾಂತ್ ಅಪ್ಲೊ ಧರ್ಮ್ ಬದ್ಲುಂಕ್ ಜಾಯ್. ಸಾಂಗಾತಾಚ್ ಧರ್ಮ್ ಬದ್ಲಾವಣೆಚಾ ವಾವ್ರಾಂತ್ ಮೆತೆರ್ ಜಾಂವ್ಚ್ಯಾ ರೆಲಿಜಿಯೊಸ್ ಮುಕೆಲ್ಯಾನ್ ಧರ್ಮ್ ಬದ್ಲಾವಣೆಂ ವಿಶಿಂ ವರ್ದಿ ಅಧಿಕಾರಿ ಸಮೊರ್ ದಾಖಲ್ ಕರುಂಕ್ ಜಾಯ್. ಜರ್ ರೆಲಿಜಿಯೊಸ್ ಮುಕೆಲಿ ತಶೆಂ ಕರುಂಕ್ ಚುಕ್ತಾ ತರ್ ತಾಕಾ 3 ವರ್ಸಾಂಚಿ ಜಯ್ಲಾ ಶಿಕ್ಷ್ಯಾ ಅನಿಂ ಧರ್ಮ್ ಬದ್ಲಾವಣ್ ಕೆಲ್ಲೊ ವ್ಯಕ್ತಿ ಪ್ರಾಯ್ ಭರನಾತಲ್ಲೊ, ವಾ ದಲಿತ್ ವಾ ಸ್ತ್ರೀ ತರ್ ಚಡ್ತಿಕ್ 1 ವರ್ಸಾಚಿ ಜಯ್ಲಾಚಿ ಶಿಕ್ಷ್ಯಾ ಜಾತೆಲಿ.
ಹೆಂ ಬಿಲ್(ಕಾನುನ್) ಜುಲೈಚಾ 10 ತಾರೀಕೆರ್ ಮದ್ಯ ಪ್ರದೇಶ್ ವಿಧಾನ್ ಸಭೆ ಹುಜಿರ್ ಪಾಸ್ ಜಾವ್ನ್ ಪ್ರಸ್ತುತ್ ರಾಜ್ಯ್ ಪಾಲಾಚಾ ದಸ್ಕತೆಕ್ ರಾಕೊನ್ ಅಸಾ. ಹೆಂ ಕಾನುನ್ ತಿದ್ದುಪಡಿ ಜಾತಾ ತರ್ ಧಾರ್ಮಿಕ್ ಅಚರಣಾಂಚೊ ಅಧಿಕಾರ್ ಸರ್ಕಾರಾಚಾ ಹಾತಾಂತ್ ಪಡ್ಚೊ ಸಂಭವ್ ಅಸಾ ಅನಿ ಅಶೆಂ ಸಂವಿಂಧಾನಾಂತ್ ದಿಲ್ಲ್ಯಾ ಹಕ್ಕಾಚೆ ಉಲ್ಲಂಘನ್ ಜಾಂವ್ಚಿ ಸಂಪೂರ್ಣ್ ಸಾಧ್ಯತಾ ಅಸಾ. ದೆಕುನ್ ಥಂಯ್ಚೆ ಕ್ರಿಸ್ತಾಂವ್ ಅನಿ ಹೆರ್ ಮುಕೆಲಿ ಹ್ಯಾ ಕಾನುನಾಚೆ ತಿದ್ದುಪಡಿಕ್ ಬಳಾಚೆ ವಿರೋಧ್ ವ್ಯಕ್ತ್ ಕರ್ನ್ ಅಸಾತ್.
Comments powered by CComment