ಮಾ. ಬಾಪ್. ಫ್ರಾನ್ಸಿಸ್ ಅಸ್ಸಿಸಿ ಅಲ್ಮೇಡಾ,
ಯಾಜಕ್ ಅನಿ ವಕೀಲ್ (ಮಂಗ್ಳುರ್ ದಿಯೆಸೆಜ್)

ಪ್ರಸ್ತಾವನ್:
ಭಾರತಾಂತ್ ಚಡಾವತ್ ಲೊಕ್ ದುಬ್ಳೊ ಅನಿ ಹಾಕಾ ಕಾರಣ್ ಅರ್ಥಿಕ್ ತಫಾವತ್, ಶಿಕ್ಷಣಾಚೊ ಅಭಾವ್, ಅನಿಂ ನೆಣಾರ್ಪಣ್. ಗ್ರಾಹಕ್ ತಾಂಕಾ ಅಸ್ಚೆ ಹಕ್ಕ್ ನೆಣಾ ಅಸೊನ್, ವ್ಯಾಪಾರಿಂಚ್ಯಾ ಹಾತಾಂತ್ ಸಾಂಪಡ್ನ್, ಅಪ್ಣಾಕಂಚ್ ರಕ್ಷಣ್ ಕರುಂಕ್ ಅಸಾಧ್ಯ್ ಜಾಲ್ಲಿ ಪರಿಸ್ಥಿತಿ. ವ್ಯಾಪಾರಿ, ಕ್ಯೆಗಾರಿಕೋಧ್ಯಮಿ ಅನಿಂ ಸೆವಾ ದೀಂವ್ಚೆಂ ವ್ಯಕ್ತಿನಿಂ ಕರ್ಚ್ಯಾ ಶೋಷಣಾಂಕ್ ಒಳಗ್ ಜಾವ್ನ್, ತಕ್ಲಿ ಉಬಾರ್ನ್ ಚಲೊಂಕ್ ಅಸಾಧ್ಯ್ ಜಾಂವ್ಚಿ ಪರಿಗತ್. ಘಡ್ಯೆನ್ ಗ್ರೇಸ್ತ್ ಜಾಂವ್ಚೆ ಅಶೆನ್ ಅಬ್ಲೇಶಿಪಣಾಕ್ ಒಳಗ್ ಜಾಲ್ಲ್ಯಾ ವ್ಯಾಪಾರಿ ಥಾವ್ನ್ ಜೀವಾಕ್ ಹಾನಿಕಾರಕ್ ಅನಿಂ ಗ್ರಾಹಕಾಂಕ್ ಮೋಸ್ ಕರ್ಚ್ಯಾ ತಸಲೊ ವಹಿವಾಟ್ ಜಾತಾ. ಅಯ್ಚ್ಯಾ ಕಾಲಾರ್ ಭ್ರಷ್ಟಾಚಾರ್ ಸದಾಂಚೆ ಜಾಲಾ.

ಗ್ರಾಹಕಾಂಚೊ ರಕ್ಷಣ್ ಕಾಯ್ದೊ 1986

ವ್ಯಾಪಾರಿಂಚ್ಯಾ ಹಾತಾಂತ್ ಸಾಂಪಡಲ್ಲ್ಯಾ ಗ್ರಾಹಕಾಕ್ ಗ್ರಾಹಕಾಂಚೊ ರಕ್ಷಣ್ ಕಾಯ್ದೊ 1986 ಜ್ಯಾರಿಯೆಕ್ ಅಯ್ಲ್ಯಾ ಉಪ್ರಾಂತ್ ಜೀವ್ ಭರ್ಲೊ ಹ್ಯಾ ಕಾನುನಾಂತ್ 31 ಕಲಂ ಅಸಾತ್. ಹೆಂ ಕಾನುನ್ ಪಳೆಂವ್ಕ್ ಲ್ಹಾನ್ ತರೀ ಹಾಚೊ ಪರಿಣಾಮ್ ಭರ್ಪೂರ್ ಜಾಲಾ. ಹೆಂ ಕಾನುನ್ ದಿಸೆಂಬ್ರಚ್ಯಾ 24 ತಾರೀಕೆರ್ 1986 ಂತ್ ಜ್ಯಾರಿಯೆಕ್ ಅಯ್ಲೆಂ. ಹ್ಯಾ ಕಾನುನಾಚ್ಯಾ ಪ್ರಸ್ತಾವನಾಂತ್ ಗ್ರಾಹಂಕಾಚಿ ಇಚ್ಛಾ ಸಂಪೂರ್ಣ್ ಕರ್ಚೊ ಉದ್ದೇಶ್ ಉಲ್ಲೇಖ್ ಜಾಲಾ. ಹೆಮ್ ಕಾನುನ್ ಯೆಂವ್ಚ್ಯಾ ಪಯ್ಲೆಂ “ಗ್ರಾಹಕ್ ಜಾಗೆ ಅಸೊನ್ ವ್ಯಾಪಾರ್ ಕರಾ” ಮ್ಹಳ್ಳೆಂ ದ್ಯೇಯ್ ವಾಕ್ಯ್ ಅಸಲ್ಲೆಂ ತರ್ ಅತಾಂ “ವ್ಯಾಪಾರಿ ಜಾಗೆ ರಾವೊನ್ ವ್ಯಾಪಾರ್ ಕರಾ” ಮ್ಹನ್ ಜಾಲಾ.

ಗ್ರಾಹಕ್ ಮ್ಹಳ್ಳ್ಯಾರ್ ಕೋಣ್?

    ಕಲಂ 2 (1) (d) ಪ್ರಕಾರ್ ಗ್ರಾಹಕ್ ಮ್ಹಳ್ಳ್ಯಾರ್-
1.    ವ್ಯಾಪಾರಿ ಥಾವ್ನ್ ವಸ್ತ್ ಮೋಲಾಕ್ ಕಾಣ್ಘೆಂವ್ಚೊ;
2.    ಸೆವಾ ದಿತೆಲ್ಯಾ ಥಾವ್ನ್ ಸೆವಾ ಅಪ್ಣಾಂವ್ಚೊ;
3.    ಮೋಲಾಕ್ ಘೆಂವ್ಚಿ ವಸ್ತ್ ವಾ ಅಪ್ಣಾಂವ್ಚಿ ಸೆವಾ ಗ್ರಾಹಕಾನ್ ಉಪ್ರಾಂತ್ ವ್ಯಾಪಾರ್ ಕರ್ಚ್ಯಾಕ್ ಅಸೊಂಕ್ ನಜೊ.
4.    ಸೆವಾ ವ ವಸ್ತ್ ಮೋಲಾಕ್ ಅಪ್ಣಾಂವ್ಕ್ ಜಾಯ್.

ಕಂಪ್ಲೇಂಟ್ ವ ದೂರ್ ದೀಂವ್ಕ್ ಕಾರಾಣಾಂ ಅನಿಂ ದೂರ್ ಕೋಣೆಂ ದಿವ್ಯೇತ್?  

ಕಾಣ್ಘೆಲ್ಲಿ ವಸ್ತ್ ವಾ ಭಾಡ್ಯಾಕ್ ಅಪ್ಣಾಯಿಲ್ಲೆ ಸೆವೆಂತ್ ಕಿತೆಂಯಿ ತರೀ ಉಣೆಂ ಪಣ್ ಅಸಾ ತರ್ ತಿ ವಸ್ತ್ ಸಾರ್ಕಿ ನಾ ವಾ ಸೆವಾ ತ್ರಪ್ತಿದಾಯಕ್ ನಾಂ ಮ್ಹಳ್ಳ್ಯಾ ಕಾರಣಾಕ್ ಲಾಗೊನ್ ದೂರ್ ದಿವ್ಯೇತ್. ಜರ್ ಎಕ್ ವ್ಯಕ್ತಿ ತಿ ವಸ್ತ್ ವ ಸೆವಾ ಮೋಲ್ ದಿನಾಸ್ತಾಂ ಅಪ್ಣಾಯ್ತಾ ತರ್ ತ್ಯಾ ಸಂಗ್ತಿಂತ್ ಉಣೆಂಪಣ್ ಅಸಾ ಮ್ಹಣ್ ದೂರ್ ದೀಂವ್ಕ್ ಸಾಧ್ಯ್ ನಾಂ.

ದೂರ್ ಹ್ಯಾ ವ್ಯಕ್ತಿನಿಂ ದೀವ್ಯೆತ್- ವಸ್ತ್ ಕಾಣ್ಗೆಲ್ಲೊ ಗ್ರಾಹಕ್, ತಾಚೊ ಉತ್ತರಾಧಿಕಾರಿ, ವಾ ತ್ಯಾ ಗ್ರಾಹಕಾಚೊ ಕಾನುನಿ ದ್ರಷ್ಟೇನ್ ಅಸ್ಚೊ ತಾಚೊ  ಎಜೆಂಟ್, ಖಂಯ್ಚೊಯ್ ಎಕ್ ಸ್ವಯಂ ಸಂಘ್, ಗ್ರಾಹಕಾಂಚಿ ವೇದಿಕೆ ಅನಿಂ ಕೇಂದ್ರ್ ವ ರಾಜ್ಯ್ ಸರ್ಕಾರ್.

ದೂರ್ ದೀಂವ್ಕ್ ಅನಿಂ ಪರಿಹಾರ್ ಅಪ್ಣಾಂವ್ಕ್ ಅಸ್ಚ್ಯೊ ವೇದಿ ಅನಿಂ ಅಯೋಗ್:
1.    ಜಿಲ್ಲ್ಯಾ ಗ್ರಾಹಕಾಂಚಿ ವೇದಿ (ಜಿಲ್ಲ್ಯಾ ಮಟ್ಟಾರ್)- ಮೋಲ್ ರುಪಯ್ 20 ಲಾಕ್ ಪರ‍್ಯಾಂತ್ ಅಸಲ್ಲ್ಯಾ ವಸ್ತು ವಿಶ್ಯಾಂತ್ ದೂರ್ ದಾಖಲ್ ಕರ್ಯೆತ್; 
2.    ರಾಜ್ಯ್ ಗ್ರಾಹಕಾಂಚ್ಯಾ ಝಗ್ಡ್ಯಾ ಪರಿಹಾರಾಚೆಂ ಅಯೋಗ್(ರಾಜ್ಯ್ ಮಟ್ಟಾರ್)- ಮೋಲ್ ರುಪಯ್ 20 ಲಾಖಾ ಥಾವ್ನ್ 1 ಕೊರೊಡ್ ಪರ್ಯಾಂತ್ ಅಸಲ್ಲ್ಯಾ ವಸ್ತು ವಿಶ್ಯಾಂತ್ ದೂರ್ ದಾಖಲ್ ಕರ್ಯೆತ್;
3.    ರಾಷ್ಟೀಯಾ ಗ್ರಾಹಕಾಂಚ್ಯಾ ಝಗ್ಡ್ಯಾ ಪರಿಹಾರಾಚೆಂ ಅಯೋಗ್(ರಾಷ್ಟೀಯ್ ಮಟ್ಟಾರ್)- ಮೋಲ್ ರುಪಯ್ 1 ಕೊರೊಡಾ ವಯ್ರ್ ಅಸಲ್ಲ್ಯಾ ವಸ್ತು ವಿಶ್ಯಾಂತ್ ದೂರ್ ದಾಖಲ್ ಕರ್ಯೆತ್.

ಜಿಲ್ಲ್ಯಾ ಗ್ರಾಹಕ್ ವೇದಿ ಥಾವ್ನ್ ರಾಜ್ಯ ಅಯೋಗಾಕ್ ಮನವಿ ಕರುಂಕ್ 30 ದೀಸಾಂಚೊ ಅವ್ಕಾಸ್ ಅಸಾ. ರಾಜ್ಯ್ ಅಯೋಗಾನ್ 30 ದೀಸಾಂ ಉಪ್ರಾಂತ್ ಮನವಿ ಸ್ವೀಕರ್ ಕರಿಜೆ ತರ್ ಮನವಿ ಕರುಂಕ್ ವೇಳ್ ಜಾಂವ್ಕ್ ಫಾವೊತೆಂ/ಸಾರ್ಕೆಂ ಕಾರಣ್ ಅಸೊಂಕ್ ಜಾಯ್. ತಸೆಂಚ್ ರಾಜ್ಯ್ ಅಯೋಗಾ ಥಾವ್ನ್ ರಾಷ್ಟ್ರೀಯ್ ಅಯೋಗಾಕ್ ಮನವಿ ಕರುಂಕ್ 30 ದೀಸ್ ಅನಿಂ ಮನವಿ ಕರುಂಕ್ ವೇಳ್ ಜಾಲ್ಯಾರ್ ಜೊಕ್ತೆಂ ಕಾರಣ್ ದೀಮ್ವ್ಕ್ ಜಾಯ್.

ಖಂಯ್ಚ್ಯಾಯ್ ವ್ಯಕ್ತಿಕ್ ಅಪ್ಣಾಕ್ ರಾಷ್ಟ್ರೀಯ್ ಗ್ರಾಹಕಾಂಚ್ಯಾ ವೇದಿ ಥಾವ್ನ್ ನ್ಯಾಯ್ ಮೆಳೊಂಕ್ ನಾಂ ಮ್ಹಣ್ ಭೊಗ್ತಾ ತರ್ ತ್ಯಾ ವ್ಯಕ್ತಿನ್ ಸುಪ್ರೀಮ್ ಕೊಡ್ತಿಕ್ ಮನವಿ ಕರ್ಯೇತ್. ಹಿ ಮನವಿ ರಾಷ್ಟ್ರೀಯ ಗ್ರಾಹಕ್ ವೇದಿ ಥಾವ್ನ್ ಅದೇಶ್ ಜಾಲ್ಲ್ಯಾ  30 ದಿಸಾಂ ಭಿತರ್ ಕರುಂಕ್ ಜಾಯ್. 30 ದೀಸಾಂ ಉಪ್ರಾಂತ್ ಸುಪ್ರೀಮ್ ಕೊಡ್ತಿನ್ ಮನವಿ ಸ್ವೀಕಾರ್ ಕರಿಜೆ ತರ್ ಮನವಿ ಕರುಂಕ್ ವೇಳ್ ಜಾಂವ್ಕ್ ಫಾವೊತೆಂ/ಸಾರ್ಕೆಂ ಕಾರಣ್ ಅಸೊಂಕ್ ಜಾಯ್.

ದಾಖಲ್ ಜಾಲ್ಲ್ಯಾ ಕಂಪ್ಲೇಟಾಂಚಿ ವಿಲೆವಾರಿ ಕರ್ಚೆಂ ವಿಧಾನ್:
    ಗ್ರಾಹಕಾಂಚ್ಯಾ ವೇದಿ ವ ಅಯೋಗಾಚೊ ಪ್ರಮುಖ್ ಉದ್ದೇಶ್ ಗ್ರಾಹಕಾಂಕ್ ಸುಲಭಾಯೆನ್ ಅನಿಂ ಸೊಂಪ್ಯಾ ವಿಧಾನಾ ದ್ವಾರಿಂ ನ್ಯಾಯ್ ದೀಂವ್ಚೊ. ದೆಕುನ್ ಹ್ಯಾ ವೇದಿ ವಾ ಅಯೋಗಾ ಸಾಮ್ಕಾರ್ ದೂರ್ ದಾಖಲ್ ಕರ್ನ್ ಪರಿಹಾರ್ ಅಪ್ಣಾಂವ್ಕ್ ಸುಲಭ್. ಹಾಚೆಂ ವಿಧಾನ್ ಸರಿ ಸುಮಾರ್ ಹ್ಯಾ ಪರಿಂ ಅಸ್ತೆಲೆಂ-

  • ದೂರ್ ದಾಖಲ್ ಕರುಂಕ್ ಅಸಲೆಂಚ್ ವಿಧಾನ್ ಮ್ಹಳ್ಳೆಂ ನಾಂ. ಸಿವಿಲ್ ದಾವೆ ದಾಖಲ್ ಕರ್ಚ್ಯಾ ತಸಲೆಂ ಕ್ಲೀಷ್ಟಕಾರಕ್ ವಿಧಾನ್ ಜರ್ ಘಾಲ್ಲೆಂ ದೂರ್ ಬದ್ಲುಂಕ್ ಅಸಾ ತರ್, ವ ಖಂಯ್ಚ್ಯಾಯ್ ನವ್ಯಾ ವ್ಯಕ್ತಿಕ್ ಪಾರ್ಟಿ ಕರುಂಕ್ ಅಸಾ ವಾ ಸೊಡುಂಕ್ ಅಸಾ ತರ್, ವಾ ಹೆರ್ ತಸಲಿಂ ಬದ್ಲಾವಣ್ ಕರುಂಕ್ ಅಸಾ ತರ್.
  • ದೂರ್ ಸ್ವಾಕಾರ್ ಕೆಲ್ಯಾ ಉಪ್ರಾಂತ್ ಜಿಲ್ಲ್ಯಾ ವೇದಿಕೆನ್ ದೂರ್ ದಿಲ್ಯಾಚಾ ವಿರೋದ್ ಪಾಡ್ತಿಕ್ ಕಂಪ್ಲೇಟ್ ಪ್ರತಿ ದೂರ್ ದಾಖಲ್ ಜಾಲ್ಲ್ಯಾ 30 ದೀಸಾ ಭಿತರ್ ಪಾವಿತ್ ಕರಿಜೆ (ಗರ್ಜ್ ಪಡ್ಲ್ಯಾರ್ 15 ದೀಸ್ ಚಡ್ ಕರ್ಯೇತಾ).
  • ಝಗ್ಡ್ಯಾಕ್ ಕಾರಣ್ ಜಾಲ್ಲ್ಯಾ ವಾ ಉಣೆಂಪಣ್ ಅಸಲ್ಲಿ ವಸ್ತ್ ಲ್ಯಾಬೊರೆಟರಿಚ್ಯಾ ಪರೀಕ್ಷೇಕ್ ಒಳಗ್ ಕರ್ನ್ ವ ಸಾಕ್ಷಿಂಕ್ ಪರಿಶೀಲನ್ ಕರ್ನ್ ನಯ್ಸರ್ಗಿಕ್ ನ್ಯಾಯಾ ಪ್ರಾಕಾರ್ ದೋನಿಂ ಪಾಡ್ತಿಂಕ್ ಅಯ್ಕೊನ್ ನ್ಯಾಯಾಧಿಕರಣ್ ಕರ್ಚೊ.
  • ಹ್ಯಾ ಗ್ರಾಹಕಾಂಚಾ ವೇದಿಕ್ ಸಿವಿಲ್ ಕಾನುನಾ ಸಕಯ್ಲ್ ಪಾಡ್ತಿಂಕ್ ಕೊಡ್ತಿಕ್ ಹಾಜರ್ ಜಾಂವ್ಕ್ ಸಮನ್ಸ್ ಜ್ಯಾರಿ ಕರುಂಕ್, ದಾಖ್ಲ್ಯಾಂಚಿ ಅನಿಂ ಸಾಕ್ಷೀಂಚಿ ಪರೀಕ್ಷಾ ಕರುಂಕ್ ಅನಿಂ ಹೆರ್ ತಸಲೆ ಅಧಿಕಾರ್ ಅಸಾತ್.
  • ಪಯ್ಸ್ಯಾಂಚಿ ವಾ ಜಾಗ್ಯಾಚಾ ಅದಿಕಾರಾಚಿ ಪರಿಮಿತೆ ಭಾಯ್ರ್ ಎಕಾ ವೇದಿಕೆನ್ ನ್ಯಾಯ್ ನಿರ್ಣಯ್ ಕೆಲೊ ತರ್ ತೊ ನಿರ್ಣಯ್ ನುಲ್ಲ್ ಜಾತಾ.

ಜಿಲ್ಲ್ಯಾ ವೇದಿಕ್ ಝಗ್ಡ್ಯಾಕ್ ಕಾರಣ್ ಜಾಲ್ಲ್ಯಾ ವಸ್ತುಂ ಥಂಯ್/ಕೆಲ್ಲ್ಯಾ ಸೆವೆಂ ಥಂಯ್ ಉಣೆಂಪಣ್ ದಿಸ್ಲ್ಯಾರ್ ಹೆ ಪರಿ ಅದೇಶ್ ದಿವ್ಯೆತ್:
1.    ಕಾಣ್ಘೆಲ್ಲ್ಯಾ ವಸ್ತುಂತ್ ಅಸಲ್ಲೆಂ ಉಣೆಪಣ್ ಸಮಾಂ ಕರುಂಕ್;
2.    ವಸ್ತ್ ಬದ್ಲುನ್ ದೀಂವ್ಕ್;
3.    ವಸ್ತ್ ಪಾಟಿಂ ಕಾಣ್ಘೆವ್ನ್ ದಿಲ್ಲೆ ಪಯ್ಶೆ ಪಾಟಿಂ ದೀಂವ್ಕ್;
4.    ನಷ್ಟ್ ಜಾಲ್ಲೊ ಖರ್ಚ್ ಭರ್ತಿ ಕರ್ನ್ ದೀಂವ್ಕ್ ವಾ ಪರಿಹಾರ್ ದೀಂವ್ಕ್;
5.    ಭಾಡ್ಯಾಕ್ ದಿಂವ್ಚ್ಯಾ ಸೇವೆ ಥಂಯ್ ಅಸಲ್ಲೆಂ ಉಣೆಂಪಣ್ ಸಾರ್ಕೆಂ ಕರುಂಕ್;
6.    ವ್ಯಾಪಾರ್ ಚಲಂವ್ಚ್ಯಾಂತ್ ವಾ ಸೆವಾ ಭಾಡ್ಯಾಕ್ ದೀಂವ್ಚ್ಯಾಂತ್ ಸಾರ್ಕೆಂ ವಿಧಾನ್ ವಾಪಾರ್ನಾಂ ತರ್ ತೊ ಉದ್ಯೋಗ್ ಬಂಧ್ ಕರುಂಕ್;
7.    ಜೀವಾಕ್ ಅಪಾಯ್ ಜಾಂವ್ಚೊ ವ್ಯಾಪಾರ್ ಬಂಧ್ ಕರುಂಕ್;
8.    ನ್ಯಾಯ್ ಅಪ್ಣಾಂವ್ಕ್ ವರಯಿಲ್ಲೊ ಖರ್ಚ್ ಅಪ್ಣಾಂವ್ಕ್; ಹೆ ಅನಿ ಹೆರ್ ಆಸಲೆ ಅದೇಶ್ ದೀವ್ಯೆತ್. 

ಅದೇಶ್ ಅಂತಿಮ್ ಜಾಂವ್ಚೊ:
ಜರ್ ಜಿಲ್ಲ್ಯಾ ಗ್ರಾಹಕಾಂಚೆ ವೇದಿನ್, ರಾಜ್ಯ್ ಅಯೋಗಾನ್ ವಾ ರಾಷ್ಟ್ರೀಯ್ ಅಯೋಗಾನ್ ದಿಲ್ಲ್ಯಾ ಅದೇಶಾ ವಿರೋಧ್ ಸಂಭಂಧ್ ಜಾಲ್ಲ್ಯಾ ವಯ್ಲ್ಯಾ ಅಯೋಗಾಕ್/ಸುಪ್ರೀಮ್ ಕೊಡ್ತಿಕ್ ಫಾವೊ ತ್ಯಾ ವೇಳಾ ಭಿತರ್ ಮನವಿ ಕರುಂಕ್ ನಾಂ ತರ್ ವಾ ವೇಳ್ ಕರ್ನ್ ಕೆಲ್ಲಿ ಮನವಿ ತಿರಸ್ಕ್ರತ್ ಜಾತಾ ತರ್ ಖಂಯ್ಚ್ಯಾ ವೇದಿಕೆನ್/ಅಯೋಗಾನ್ ದಿಲಾ ತೊ ಅದೇಶ್ ಅಂತಿಮ್ ಜಾತಾ. ಅಂತಿಮ್ ಅದೇಶ್ ಜ್ಯಾರಿ ಕರ್ಚೊ ಅಧಿಕಾರ್ ಜಿಲ್ಲ್ಯಾ ವೇದಿಕೆಕ್ ಅಸ್ತಲೊ.

ದೂರ್ ದಾಖಲ್ ಕರುಂಕ್ ಅವ್ದಿ:  

ಖಂಯ್ಚಿಯ್ ಕಾಣ್ಘೆಲ್ಲಿ ವಸ್ತ್/ಭಾಡ್ಯಾಕ್ ಅಪ್ಣಾಯಿಲ್ಲಿ ಸೇವಾ ಜರ್ ಉಣೆಂಪಣ್ ದಾಖಯ್ತಾ ವಾ ವ್ಯಾಪಾರಿಸ್ತಾನ್ ದಿಲ್ಲ್ಯಾ ಅಶ್ವಾಸನೆಕ್ ವ್ಯತಿರಿಕ್ತ್ ಮ್ಹಣ್ ಜಾತಾ, ಹೆಂ ಕಳಲ್ಲ್ಯಾ ಭರ್ತಿ ದೋನ್ ವರ್ಸಾಂ ಭಿತರ್ ದೂರ್ ದಾಖಲ್ ಕರಿಜಾಯ್. ಜರ್ ವೇಳ್ ಜಾಲೊ ತರ್ ವೇಳ ಜಾಲ್ಲ್ಯಾಕ್ ಫಾವೊ ತೆಂ ಕಾರಣ್ ದೀವ್ನ್ ದೂರ್ ದಾಖಲ್ ಕರುಂಕ್ ಜಾಯ್. ಜಿಲ್ಲ್ಯಾ ಗ್ರಾಹಕಾಂಚಿ ವೇದಿ/ ರಾಜ್ಯ್ ಅಯೋಗ್/ರಾಷ್ಟ್ರೀಯ್ ಅಯೋಗ್ ಜರ್ ವೇಳ್ ಜಾಲ್ಯಾರಿ ವೇಳ್ ಅಭಾಧಿತ್ ಮ್ಹಣ್ ಮನ್ನಾ ಕರ್ನ್ ದೂರ್ ಕಾಣ್ಘೆತಾ ತರ್ ತಾಚಿ ಕಾರಣಾಂ ಬರವ್ಣೆಂ ದ್ವಾರಿ ದಾಖಲ್ ಕರುಂಕ್ ಜಾಯ್.

Comments powered by CComment

Copyright © 2013 - www.christiankanoon.com. Powered by eCreators